नवी दिल्ली - राजस्थानच्या अलवरमध्ये एक मन सुन्न करणारी घटना घडली आहे. हसतं खेळतं घर उद्ध्वस्त झालं आहे. ज्या घरातून मुलाची वरात निघणार होती. त्याच घरातून आईची अंत्ययात्रा निघाल्याची हृदयद्रावक घटना आता समोर आली आहे. आपल्या मुलाच्या लग्नात डीजेवर डान्स करताना त्याच्या आईचा दुर्देवी मृत्यू झाला. नवरदेवदेखील आईसोबत डान्स करीत होता. तितक्यात आई खाली पडते. नवरदेवाने लगेच खाली पडलेल्या आईला सांभाळण्याचा प्रयत्न केला. मात्र आईने नवरदेवाच्या कुशीत जीव सोडला. ही संपूर्ण घटना तेथील एका तरुणाच्या कॅमेऱ्यात कैद झाली आहे.
3 फेब्रुवारी रोजी ही घटना घडली असून याचा एक व्हिडीओदेखील समोर आला आहे. मिळालेल्या माहितीनुसार, अलवरच्या चिकानीमध्ये सतीश आणि निलम यांचा मुलगा नीरज याचं लग्न होतं. किशनगडपासून बंबोरा येथे वरात जाणार होती. 4 फेब्रुवारी रोजी सप्तपदी होणार होत्या. 55 वर्षीय आई निलम यांची तब्येत 3 फेब्रुवारी रोजी लग्नापूर्वीच्या विधीत चांगली होती. यानंतर रात्री डीजेवर डान्स सुरू होता. याच दरम्यान नातेवाईकांनी निलमलाही डान्स करण्याचा आग्रह केला. त्या डान्स करता करता अचानक खाली कोसळल्या. मुलाने तातडीने आईला सांभाळलं आणि तिला रुग्णालयात घेऊन गेला. येथे डॉक्टरांनी निलम यांना मृत घोषित केलं.
अवघ्या 20 सेकंदात मृत्यू
कुटुंबीयांनी दिलेल्या माहितीनुसार, निलम यांनी सेकंदापूर्वीच डान्स सुरू केला होता. मुलगा नीरजदेखील आईसोबत डान्स करीत होता. इतक्यात नवरदेवाची आई डान्स करता करता खाली कोसळली. यादरम्यान त्यांचा हार्ट फेल झाल्याचं सांगितलं जात आहे. अवघ्या 20 सेकंदात त्यांचा मृत्यू झाला. या घटनेमुळे कुटुंबावर शोककळा पसरली आहे. मुलाने आधी आईवर अंत्यसंस्कार केले. डोळ्यातील अश्रू थांबले नसताना पुढील चार दिवसात तो वरात घेऊन लग्नासाठी पोहोचला. केवळ सप्तपदी झाले.
स्थानिकांचं म्हणणं आहे की, जिल्ह्यात अशा प्रकारची घटना यापूर्वी कधीच पाहायला घडली नाही. गावकऱ्यांनी सांगितलं की, महिलेला आधीपासून हृदयाचा त्रास होता. यामुळे तिची औषधं देखील सुरू होती. याकारणामुळे डान्स करीत असताना त्यांचं हृदय बंद पडल्याची शक्यता आहे. गेल्या काही महिन्यात लग्न समारंभांमध्ये हृदयविकाराचा झटका आल्याच्या अनेक घटना समोर आल्या आहेत. तब्बल 2 महिन्यांपूर्वी राजसमंद गावातील नवरदेवाच्या छोट्या भावाचा हृदयविकाराच्या झटक्याने मृत्यू झाला होता. एका हिंदी वेबसाईटने याबाबतचे वृत्त दिले आहे.