Uttar Pradesh Crime: कानपूर जिल्ह्यातील बिधनू परिसरात अंधश्रद्धा आणि तांत्रिक विधीच्या नावाखाली एका बापाने स्वतःच्या आठ वर्षांच्या मुलीचा बळी देण्याचा प्रयत्न केल्याची धक्कादायक घटना समोर आली आहे. मुलगी ओरडल्यामुळे आसपासच्या लोकांनी तत्काळ धाव घेतली आणि मुलीचा जीव वाचवला. घटनेनंतर संतप्त नागरिकांनी आरोपी बापाला चांगलाच चोप दिला आणि पोलिसांच्या हवाली केले.
कालव्याशेजारी घडली घटना
ही घटना रामगंगा कालव्याच्या शेजारी घडली असून हे ठिकाण बिधनू पोलीस ठाण्यापासून अवघ्या 300 मीटर अंतरावर आहे. औंधा गावातील सौरभ सैनी हा आपल्या भावासोबत नवीन घर बांधत होता. कुटुंबीयांच्या माहितीनुसार सौरभ दीर्घकाळापासून मानसिक आजाराने त्रस्त असून, तो तंत्र-मंत्र आणि अंधश्रद्धेच्या आहारी गेला आहे.
घर बांधकामाऐवजी मेकअप आणि साड्यांवर खर्च
सौरभचा भाऊ राहुल सैनी याने सांगितले की, घर बांधकामासाठी सौरभला 80 हजार रुपये दिले होते. मात्र, त्याने बांधकाम न करता ट्रॉली बॅग, झुला, मुलीसाठी नवीन कपडे, महागड्या साड्या आणि मेकअप साहित्य खरेदी केले. शनिवारी सौरभने नवीन साडी घातली आणि मुलगी वैष्णवीला नवीन कपडे घालून कालव्याच्या शेजारी घेऊन गेला. त्या वेळी तिथे इतर कोणीही नव्हते.
मुलीचा गळा दाबण्याचा प्रयत्न
सौरभने आपल्या पोटच्या मुलीचा अचानक गळा दाबण्याचा प्रयत्न केला. मुलीच्या किंकाळ्या ऐकून कालव्याच्या दुसऱ्या बाजूने जाणाऱ्या लोकांनी तत्काळ कालव्यात उडी मारली आणि मुलीची सुटका केली. त्यानंतर संतप्त नागरिकांनी आरोपीला पकडून जोरदार चोप दिला.
आरोपीचा विचित्र दावा
पोलिस चौकशीत सौरभने मुलीला मारण्याचा आरोप नाकारला आणि “माझ्या किन्नर वडिलांच्या आत्म्याने मला हे करण्यास सांगितले” असा विचित्र दावा केला. कुटुंबीयांनी सांगितले की, त्याचे वडील महिलांच्या वेशात फुले विकायचे. त्यांच्या मृत्यूनंतर सौरभच्या वागण्यात अचानक बदल झाला. पत्नी सात वर्षांपूर्वी घर सोडून गेल्यानंतर तो अंधश्रद्धेत अधिक गुंतला.
मुलगी चुलत्याकडे, आरोपी पोलिस ताब्यात
घटनेनंतर पोलिसांनी मुलीला तिचे चुलते राहुल सैनी आणि चुलती लक्ष्मी यांच्या ताब्यात दिले आहे. तर, आरोपी सौरभला पोलिसांनी ताब्यात घेतले असून त्याची चौकशी सुरू आहे. तांत्रिक विधी किंवा बळीचा पुरावा मिळाल्यास आरोपीवर गंभीर गुन्हे दाखल करण्यात येणार आहेत. तसेच त्याची मानसिक तपासणीही करण्यात येणार आहे.
Web Summary : In Kanpur, a father tried sacrificing his daughter under superstition. Locals rescued her and beat the father. He claimed a spirit told him to do it. The girl is safe with relatives; the father is in custody, facing investigation.
Web Summary : कानपुर में एक पिता ने अंधविश्वास में अपनी बेटी की बलि देने की कोशिश की। ग्रामीणों ने उसे बचाया और पिता को पीटा। उसने दावा किया कि एक आत्मा ने उसे ऐसा करने के लिए कहा था। लड़की रिश्तेदारों के साथ सुरक्षित है; पिता हिरासत में है, जांच जारी है।