लखनौ : उत्तर प्रदेशचे मुख्यमंत्री योगी आदित्यनाथ यांना जीवे मारण्याची धमकी मिळाली आहे. याप्रकरणी अज्ञात व्यक्तीविरोधात गुन्हा दाखल करण्यात आला आहे. लखनौ पोलिसांनी मंगळवारी ही माहिती दिली.
'डायल 112' (उत्तर प्रदेश सरकारने आपत्कालीन सेवांसाठी सुरू केलेला नंबर) वर मसेजद्वारे ही धमकी देण्यात आली आहे. धमकी देणाऱ्या व्यक्तीने 'मी मुख्यमंत्री योगी यांना लवकरच मारीन', असे म्हटले आहे.
धमकी मिळाल्यानंतर '112' च्या ऑपरेशन कमांडरने सुशांत गोल्फ सिटी पोलीस ठाण्यात गुन्हा दाखल केला आहे. आयपीसी कलम ५०६, ५०७ आणि आयटी अॅक्ट ६६ अंतर्गत गुन्हा दाखल करण्यात आला आहे.
दरम्यान, याआधीही उत्तर प्रदेशचे मुख्यमंत्री योगी आदित्यनाथ यांना जीवे मारण्याच्या धमक्या देण्यात आल्या आहेत.