Uttar Pradesh Assembly Election Results 2022: यूपीत शिवसेनेची अत्यंत दयनीय अवस्था; ३२ उमेदवारांना मिळालेली मतं तरी पाहा

उत्तर प्रदेश विधानसभा निवडणूक निकाल २०२२: उत्तर प्रदेश निवडणुकीत दुपारी ३ वाजेपर्यंत अनेक मतदारसंघात शिवसेनेला ‘नोटा’पेक्षाही कमी मतदान झाल्याचं दिसून आलं.

लखनौ – उत्तर प्रदेश विधानसभा निवडणुकीत शिवसेनेने ६० ठिकाणी उमेदवार उभे केले होते. परंतु त्यातील १९ जणांचा उमेदवार अर्ज बाद झाला. त्यामुळे ४१ ठिकाणी निवडणूक लढवणाऱ्या शिवसेनेला किती मतदान झालं? याची उत्सुकता सगळ्यांना आहे. महाराष्ट्रात सरकार स्थापन केल्यानंतर शिवसेनेने राष्ट्रीय राजकारणात छाप पाडण्याचा प्रयत्न सुरू केला. यूपी, गोवासारख्य राज्यात शिवसेनेने उमेदवार उभे केले. या उमेदवारांच्या प्रचारासाठी स्वत: शिवसेनेचे आदित्य ठाकरे आणि इतर नेत्यांनी प्रचार केले.

उत्तर प्रदेश निवडणुकीत दुपारी ३ वाजेपर्यंत अनेक मतदारसंघात शिवसेनेला ‘नोटा’पेक्षाही कमी मतदान झाल्याचं दिसून आलं. याठिकाणी नागरिकांनी शिवसेनेला नाकारलं आहे. जाणून घेऊया शिवसेनेच्या उमेदवारांना मिळालेली मतं

उमेदवाराचं नाव	विधानसभा मतदारसंघ	पडलेली मते	NOTA ला मिळालेली मते
सीमा देवी	जमानिया	११२	५१४
सुशील कुमार	विश्वनाथगंज	१९८	६७२
राकेश कुमार	सिराथु	८५	२०८
अमित सिंह तोमर	सिकंदराबाद	१०४	६२६
शिवप्रकाश कौशल	सिंकरदाराऊ	६३	४५८
झाहीद	संभल	९७	५६४
प्रल्हाद सिंह	सहजनवा	११३	४८१
सुरेंद्र सिंह	रामपूर खास	२८४	१५३२
सुभाष चंद्रा	राम नगर	२८६	८६३
घनश्याम	प्रतापपूर	९८	२५१
माधवेंद्र प्रताप	मुंगरा बादशाहपूर	१५	१४१
विपीन भटनागर	मुरादाबाद नगर	१३०	५२९
दिपक सिरोही	मेरठ कैंट	४०	३०९
मीना कुमारी	मऊरानीपूर	४३१	१७५२
राज कुमार	मंत	२८५	४५२
गौरव वर्मा	लखनौ मध्य	९३	४८५
विपीन कुमार	कुंदरकी	२६२	१४४२
आरती देवी	कोराव	१०१९	१२५८
पवन कुमार तिवारी	किदवई नगर	३९	३१८
शैलू कश्यप	खतौली	३४६	४२१
शशी दुबे	जौनपूर	४०	९४
देवेंद्र सिंह	हथरस	१२९	५८७
विजय प्रकाश	गौरा	३२५	७५५
शैलेंद्र उर्फ राजू श्रीवास्तव	डुमरियागंज	१८२८	६२२
मुलंदर कुमार अवस्थी	धौरहरा	२२२९	२१७३
हेमंत शर्मा	दादरी	२२७	१२९८
निर्मला गुप्ता	दादरूल	२२८	६३२
राज परिक्षित सिंह	बाराबंकी	२६४	८५२
रिंकु सहानी	बलहा	४८३	१८१८
राजवंत सिंह	बहराइच	१५७	६२८
शिरोमण सिंह राजपूत	बबीना	३६३	१२४०
रश्मी	अनुपशहर	१६२	७०८

१९९१ पासून शिवसेना यूपीत निवडणूक लढतेय, पण...

आदित्य ठाकरे यांच्यासोबत शिवसेनेचे खासदार संजय राऊत यांनी पश्चिमी यूपीतील काही जिल्ह्यात प्रचार दौरे केले होते. धनुष्यबाण चिन्ह असलेल्या शिवसेनेने सुरुवातीपासून यूपी निवडणुकीत चर्चेत राहण्याचा प्रयत्न केला. समाजवादी पक्षाशी आघाडी करण्याबाबतही शिवसेनेची चर्चा झाली. परंतु त्यानंतर शिवसेना स्वबळावर निवडणुकीत उभी राहिली. १९९१ पासून शिवसेना उत्तर प्रदेशात निवडणूक लढतेय. केवळ एकदा पवनकुमार पांडेय हे आमदार म्हणून निवडून आले. यूपीत स्थानिक स्वराज्य संस्थेत अनेक ठिकाणी शिवसेनेचे उमेदवार निवडून आले आहेत. २०१९ मध्ये मुख्यमंत्री उद्धव ठाकरे यांनी अयोध्येत जात राम मंदिरात दर्शन घेतले होते. तेव्हापासून यूपीत शिवसेनेने वातावरण निर्मिती केली होती.