लखनौ - उत्तर प्रदेशमधील प्रतापगड येथे एक भीषण अपघात झाला आहे. या अपघातात १४ जणांचा मृत्यू झाला आहे. हा अपघात काल रात्री प्रयागराज-लखनौ महामार्गावर माणिकपूर पोलीस ठाण्याच्या हद्दीत भरधाव बोलेरोने उभ्या असलेल्या ट्रकला दिलेल्या धडकेमुळे झाला. बोलेरो चालकाला झोप लागल्याने हा अपघात झाला असावा, असा अंदाज आहे.अपघातग्रस्त बोलेरोमधून प्रवास करत असलेले प्रवासी हे वरातीवरून येत होते. ही सर्व मंडळी शेखपूर गावात झालेल्या विवाह सोहळ्यात सहभागी होऊन घरी परतत होती. परतत असताना सदर बोलेरो माणिकपूर पोलीस ठाण्याच्या हद्दीत आली असताना ती जाऊन उभ्या असलेल्या ट्रकला धडकली. हा अपघात एवढा भीषण होता की त्याच बोलेरोचा पूर्ण चेंदामेंदा झाला. तसेच सर्व प्रवाशांचा घटनास्थळीच मृत्यू झाला. एकूण १४ मृतांमध्ये ६ मुलांचा समावेश आहे.