उत्तर प्रदेशमधील बरेली येथून एक धक्कादायक बातमी समोर आली आहे. येथे मदरशात शिकणाऱ्या २० वर्षीय विद्यार्थ्याने त्याच मदरशामध्ये शिकणाऱ्या १३ वर्षांच्या विद्यार्थ्यासोबत अनैसर्गिक संबंध प्रस्थापित केले. एवढंच नाही तर या संबंधांचं चित्रिकरण करून ते इन्स्टाग्रामवर अपलोड केले. या प्रकरणी पोलिसांनी आरोपी विद्यार्थ्याला अटक केली असून, त्याच्याकडील मोबाईलमधून सुमारे ३० ते ४० व्हिडीओ जप्त करण्यात आले आहेत. त्यापैकी काही व्हिडीओ हे मदरशामध्ये चित्रित करण्यात आलेले आहेत.
याबाबत अधिक माहिती देताना पोलीस अधीक्षक (दक्षिण) अंशिका शर्मा यांनी सांगितले की, या प्रकरणातील आरोपी नबी हसन हा फरीदपूर पोलीस ठाण्याच्या हद्दीतील पिपरथरा गावातील रहिवासी आहे. तसेच तो एका मदरशामध्ये शिक्षण घेतो. त्याच मदरशामध्ये शिकणाऱ्या १३ वर्षीय विद्यार्थ्यासोबत हसन याने अनैसर्गिक संबंध ठेवले. तसेच हे संबंध प्रस्थापित करतानाचे व्हिडीओसुद्धा काढले.
या प्रकरणी पोलिसांना तक्रार मिळाल्यानंतर फरीदपूर पोलीस ठाण्यामध्ये आरोपीविरोधात दोन गुन्ह्यांची नोंद करण्यात आली आहे. त्यानंतर आरोपीला अटक करून त्याची रवानगी तुरुंगात करण्यात आली आहे. पोलिसांनी आरोपीचा मोबाईल जप्त करून त्याची तपासणी केली असता त्यामध्ये अनेक अश्लील व्हिडीओ सापडले आहेत. यामधील अनेक व्हिडीओंमध्ये अल्पवयीनासोबत केलेले अश्लील चाळे चित्रित करण्यात आल्याचे आढळून आले. यातील काही व्हिडीओ मदरशाच्या परिसरामध्येच चित्रित करण्यात आले होते.
आता पोलीस याप्रकरणी अधिक सखोल तपास करत असून, आरोपीने हे व्हिडीओ अन्य कुणासोबत शेअर केलेले आहेत का, तसेच या प्रकरणात आणखी कुणाचा सहभाग आहे का? याचा शोध घेतला जात आहे.