हैदराबाद: भारताला कोट्यावधीचा चुना लावून फरार झालेल्या मद्यसम्राट विजय माल्ल्याचा आदर्श डोळ्यासमोर ठेवत प्रेरणा घेण्याचा अजब सल्ला केंद्रीय आदिवासी विकास मंत्री आणि भाजपाचे नेते जुएल ओराम यांनी आदिवासी समाजातील तरुणांना दिला होता. नुसती मेहनत करू नका, मल्ल्यासारखे स्मार्ट बना असा सल्ला ओराम यांनी दिला होता. त्यांच्या या अजब सल्ल्याची चर्चा रंगल्यानंतर ओराम यांनी आता सारवासारव करत मी चुकून विजय माल्ल्याचं नाव घेतलं. मी त्याचं नाव घ्यायला नको होतं माझी चूक झाली असं म्हटलं आहे.
ओराम यांनी आदिवासींना सल्ला देताना आदिवासी असल्याचे काही फायदेही सांगितले. शिक्षण आणि उद्योग क्षेत्रात आदिवासींना आरक्षणाची सोय आहे. त्याचा फायदा घेऊन त्यांनी चांगली कामगिरी करावी, असं आवाहनही त्यांनी केलं होतं. मात्र काही वेळानंतर आपण घातलेला घोळ त्यांच्या लक्षात आला आणि या चुकीबद्दल त्यांनी दिलगिरी व्यक्त केली.