हे तेच मजेशीर केदार यादव...! लालूंचा वाढदिवस होडीवर साजरा करायला गेले आणि चिखलात पडले...

वैशाली जिल्ह्यातही लालू प्रसाद यादव यांच्या पक्षाच्या राजदच्या एका नेत्याचा वाढदिवस साजरा करताना तलावात पडल्याचा व्हिडिओ व्हायरल होत आहे.

माजी केंद्रीय मंत्री, बिहारचे माजी मुख्यमंत्री लालू प्रसाद यादव यांचा आज वाढदिवस आहे. बिहारची निवडणूक असल्याने तो नजरेत भरण्यासाठी राष्ट्रीय जनता दलाचे नेते, कार्यकर्ते मोठ्या जल्लोषात साजरा करत आहेत. असाच एका नेत्याने लालूंचा वाढदिवस चिखलाच्या तळ्यात करण्याचा प्रयत्न केला आणि गंमत अशी झाली की होडीतून तोल गेल्याने केक घेऊनच त्या चिखलात कोसळला. 

या घटनेचा व्हिडिओ व्हायरल होत आहे. लालूप्रसाद यांचा आज ७८ वा वाढदिवस होता. लालू यांच्या निवासस्थानी कार्यकर्त्यांची रांग लागली होती. लालू यांनी सर्वांचे स्वागत केले आणि त्यांच्याकडून शुभेच्छा स्वीकारल्या. परंतू, जे तिकडे जाऊ शकले नाहीत त्यांनी त्यांच्या गावात, शहरात हा वाढदिवस साजरा केला. 

वैशाली जिल्ह्यातही लालू प्रसाद यादव यांच्या पक्षाच्या राजदच्या एका नेत्याचा वाढदिवस साजरा करताना तलावात पडल्याचा व्हिडिओ व्हायरल होत आहे. केदार यादव भगवानपूर ब्लॉकमधील किरतपूर राजाराम गावात लवाजम्यासह गेले होते. तलावाच्या पाण्यात एक होडी सोडण्यात आली. पाणी म्हणजे तसा चिखलच होता. काही कार्यकर्ते आणि यादव असे चार-पाच जण होडीवर चढले. खुर्चीवर केक ठेवण्यात आला. जसा यादव यांनी केक कापायला हात पुढे केला तसा होडीचा तोल गेला आणि एका बाजुला झुकली. 

केदार यादव केक हातात घेऊन पाण्यात पडले आणि आपल्याच फजितीवर हसू लागले. एव्हाना ते चिखलाने माखलेले होते. मग किनाऱ्यावरील कार्यकर्त्यांनी आणखी काही केक आणले होते, त्यातीलच एक केक घेत तो होडीवरच कापत लालूंचा वाढदिवस साजरा करण्यात आला. 

हे तेच मजेशीर केदार यादव आहेत, ज्यांनी कधी जेसीबी मशीनवर चढून तर कधी म्हशीवर बसून केक कापला होता. एकदा तेजस्वी यादव अपघातातून थोडक्यात बचावले होते, तर या महाशयांनी राष्ट्रीय महामार्ग-२२ च्या बाजूला असलेल्या रस्त्याची पूजा केली होती.