श्रीनगर: श्रीनगरच्या श्री महाराजा हरी सिंह रुग्णालयात मंगळवारी सकाळी दहशतवाद्यांनी शिरून गोळीबार केला. या गोळीबारानंतर दहशतवादी फरार झाले आहेत. यावेळी रुग्णालयात असणाऱ्या पोलिसांनी दहशतवाद्यांना रोखण्याचा प्रयत्न केला. तेव्हा दहशतवाद्यांनी केलेल्या अंदाधुंद गोळीबारात दोन पोलीस कर्मचारी जखमी झाले. यातील एका पोलिसाचा उपचारादरम्यान मृत्यू झाला आहे.
प्राथमिक माहितीनुसार आज पोलिसांकडून नावेद या पाकिस्तानी कैद्याला महाराजा हरी सिंह रुग्णालयात तपासणीसाठी आणण्यात आले होते. त्यावेळी दहशतवाद्यांनी रुग्णालयात घुसून अंदाधुंद गोळीबार सुरू केला. याचा फायदा घेऊन नावेदने तेथून पळ काढला. त्यामागोमाग दहशतवादीही तेथून पसार झाले.