Falaknuma Express fire: प्रवाशांनी भरलेल्या ट्रेनला भीषण आग लागल्याची घटना तेलंगणामध्ये घडली आहे. ही घटना याददारी जिल्ह्यातील पडिगीपल्ली आणि बोम्मईपल्ली भागात घडली. या घटनेत हावडा-सिकंदराबाद फलकनुमा एक्सप्रेस ट्रेनच्या S4, S5, S6 स्लीपर कोच बोगी जळून खाक झाल्या. आग इतकी भीषण आहे की, ज्वाळा दूरवर दिसत होत्या.
तीन बोगी जळून खाकआग लागली तेव्हा ट्रेन हावडाहून सिकंदराबादच्या दिशेने येत होती. आग लागल्याचे कळताच प्रवाशांमध्ये एकच गोंधळ उडाला आहे. माहिती मिळताच तात्काळ ट्रेन थांबवून प्रवाशांना बाहेर काढण्यात आले. अनेक प्रवाशांनी ट्रेनमधून उडी मारून जीव वाचवण्याचा प्रयत्न केला. तोपर्यंत ट्रेन थांबली होती. काही वेळातच स्थानिक लोकही मदतीसाठी तेथे पोहोचले. सुदैवाने या घटनेत कोणालाही इजा झाली नाही.
रेल्वेने दिले चौकशीचे आदेश अग्निशमन दलाने घटनास्थळी आग विझवण्याचे काम केले. या घटनेचा एक व्हिडिओ देखील समोर आला आहे. ही आग कशी लागली, याबाबत कोणतीही माहिती मिळू शकलेली नाही. सध्या रेल्वेतील प्रवाशांना दुसऱ्या ट्रेनने पाठवण्याची व्यवस्था करण्यात येत आहे. आगीचे कारण शोधण्यासाठी रेल्वेने या प्रकरणाचा तपास सुरू केला आहे. प्राथमिक माहितीनुसार, आग एका डब्यात लागली आणि हळूहळू शेजारच्या दोन्ही डब्यांमध्ये पसरली.