रायबरेली - पहिलीत शिकणा-या विद्यार्थ्याला शिक्षिकेने बेदम मारहाण करत, संपुर्ण शाळेत नग्न धिंड काढण्यात आल्याची धक्कादायक घटना समोर आली आहे. उत्तर प्रदेशातील रायबरेलीमधील सरकारी शाळेत हा प्रकार घडला आहे. मुलाच्या वडिलांनी यासंबंधी पोलीस ठाण्यात तक्रार दाखल केली आहे. शाळा प्रशासनाने मात्र सर्व आरोप फेटाळून लावले असून निराधार असल्याचा दावा केला आहे. मॉडर्न पब्लिक स्कूलमध्ये हा प्रकार घडला असून, सहा वर्षीय विद्यार्थी पहिलीत शिकत आहे.
मुलाच्या वडिलांनी दिलेल्या माहितीनुसार, '23 ऑक्टोबर रोजी त्यांचा मुलगा शाळेत गेला होता. यावेळी कोणत्यातरी कारणावरुन शिक्षिकेने त्याला बेदम मारहाण केली. मारहाणीमुळे त्याच्या चेह-यावर आणि गळ्यावर जखम झाली आहे'. मारहाणीमुळे मुलगा प्रचंड घाबरला असून, शाळेत जाण्यास नकार देत आहे असं त्यांनी सांगितलं आहे.
पीडित मुलाने सांगितलं आहे की, शिक्षिकेने त्याला प्रचंड मारहाण केली. कपडे काढून संपुर्ण शाळेत फिरवलं, आणि नंतर जमिनीवर बसून जेवायला लावलं. पोलिसांनी तक्रार मिळाली असून, तपास सुरु असल्याचं सांगितलं आहे.
शाळेच्या मुख्याध्यापिका वीना खन्ना यांचं म्हणणं आहे की, मुलाचे आई-वडिल जे आरोप करत आहेत ते निराधार आहेत. 'जर त्यांची काही तक्रार होती तर त्यांनी शाळेत येऊन तक्रार करायला हवी होती. त्यांना पोलीस ठाण्यात जाण्याची काय गरज होती. शाळेत मुलाला कोणत्याही प्रकारे टॉर्चर करण्यात आलेलं नाही', असं त्यांनी सांगितलं आहे.
काही दिवसांपुर्वीही असंच एक प्रकरण समोर आलं होतं. उत्तर प्रदेशातील बुलंदशहर जिल्ह्यात एका शाळेत नववीत शिकणा-या 13 वर्षीय विद्यार्थ्याला शिक्षकाने बेदम मारहाण केली होती. ज्यामध्ये त्याच्या गुप्तांगाला जखम झाली होती. भुगोलाचं पुस्तक घरी विसरल्याने शिक्षकाने मारहाण केली होती. विद्यार्थ्याच्या गुप्तांगावरही मारहाण झाली होती. प्रकृती खराब झाल्याने विद्यार्थ्याला रुग्णालयात दाखल करण्यात आलं होतं.