Supriya Sule PM Modi News: पहलगाममधील दहशतवादी हल्ल्यानंतर भारताने ऑपरेशन सिंदूरमधून जोरदार प्रत्युत्तर दिले. त्यानंतर दोन्ही देशात तणाव वाढला होता. पाकिस्तानकडून खोटे आरोप करत कांगावा केला गेला. दहशतवाद्यांना पोसणाऱ्या पाकिस्तानचा बुरखा फाडण्यासाठी भारताने जगभरात शिष्टमंडळं पाठवली. ही शिष्टमंडळे मायदेशी परतल्यानंतर पंतप्रधाननरेंद्र मोदी यांनी त्यांची भेट घेतली. या भेटीवेळी खासदार सुप्रिया सुळे यांनी मोदींना दोन पुस्तके भेट म्हणून दिली.
'लोकमत'चं WhatsApp चॅनल फॉलो करा!
पाकिस्तानकडून दहशतवाद्यांना आश्रय दिल्याचे वारंवार समोर आले आहे. भारताने ऑपरेशन सिंदूर हाती घेत दहशतवाद्यांवर जबर घाव घातला. भारताच्या दहशतवादविरोधी कारवाईबद्दल पाकिस्तानने मात्र खोटे दावे केले. पाकिस्तानचा खोटारडेपणा जगासमोर आणण्यासाठी भारताने खासदारांची सात शिष्टमंडळे जगभरात पाठवली होती.
मोदींनी घेतली शिष्टमंडळातील नेत्यांची भेट
वेगवेगळ्या देशात जाऊन भारताची बाजू मांडणाऱ्या शिष्टमंडळातील नेत्यांची पंतप्रधाननरेंद्र मोदी यांनी मंगळवारी भेट घेतली. या भेटीवेळी खासदारांनी पंतप्रधान मोदींना वेगवेगळ्या भेटवस्तू दिल्या. खासदार सुप्रिया सुळे यांनी मोदींना दोन पुस्तके भेट म्हणून दिली.
वाचा >>जे होईल ते लोकशाही पद्धतीने सर्वांना विचारूनच होईल; सुप्रिया सुळेंचे एकत्रीकरणाबाबत विधान
सुप्रिया सुळे यांनी मोदींना कोणती पुस्तके दिली?
खासदार सुप्रिया सुळे यांनी पंतप्रधान मोदींना महाराष्ट्राचे पहिले मुख्यमंत्री यशवंतराव चव्हाण यांच्या जीवनकार्याचा आढावा घेणारी राम प्रधान यांची 'वाय. बी. चव्हाण अ पिक्चरल बायोग्राफी' आणि 'वाय. बी. चव्हाण सिलेक्टेड स्पीचेस् इन पार्लिमेंट' ही दोन पुस्तके भेट दिली.
सुप्रिया सुळेंनी मानले आभार
या भेटीबद्दल सुप्रिया सुळे म्हणाल्या, "दहशतवादाच्या विरोधात भारताची भूमिका जागतिक व्यासपीठावर मांडण्यासाठी पाठविण्यात आलेल्या सर्वपक्षीय शिष्टमंडळांच्या सदस्यांची प्रधानमंत्री नरेंद्र मोदी यांनी दिल्लीत भेट घेतली. या अतिशय महत्त्वाच्या अशा एका शिष्टमंडळाचे नेतृत्व करण्याची संधी मला मिळाली. या शिष्टमंडळाने कतार, दक्षिण आफ्रिका, इथिओपिया आणि इजिप्त या देशांचा दौरा करुन देशाची भूमिका मांडली. या दौऱ्यासाठी माझी निवड करुन एक महत्त्वपूर्ण जबाबदारी सोपविली याबद्दल भारत सरकार, पंतप्रधान, परराष्ट्र व्यवहार मंत्रालय आणि संसदीय कार्यमंत्री किरेनजी रिजेजू यांचे मनापासून आभार."