Jasbir Singh pakistan spy news: पंजाब पोलिसांच्या विशेष पोलीस पथकाने पाकिस्तानसाठी हेरगिरी केल्याच्या प्रकरणात एका युट्यूबरला अटक केली आहे. जसबीर सिंग असे या युट्यूबरचे नाव असून, तो पाकिस्तान प्रणित हेरगिरी नेटवर्कमध्ये सहभागी असल्याचे तपासातून समोर आले आहे. तो जानमहल नावाचे युट्यूब चॅनेल चालवतो.
'लोकमत'चं WhatsApp चॅनल फॉलो करा!
राज्य विशेष मोहीम विभागाच्या पथकाने मोहालीतून जसबीर सिंगला अटक केली. पोलिसांनी दिलेल्या माहितीनुसार आरोपी जसबीर सिंग हा थेट पाकिस्तानी गुप्तचर यंत्रणेतील अधिकाऱ्यांच्या संपर्कात होता.
जसबीरने कोणत्या अधिकाऱ्याला दिली माहिती?
पोलिसांनी दिलेल्या माहितीनुसार, पाकिस्तानी गुप्तचर यंत्रणेतील अधिकारी शाकीर ऊर्फ जट्ट रंधावा याच्या संपर्कात होता. तो आयएसआयचा पाठिंबा असलेल्या दहशतवाद्यांशी संबंधित हेरगिरी नेटवर्कमध्येही सहभागी आहे. जसबीर सिंग याने पाकिस्तानी गुप्तचर यंत्रणेच्या अधिकाऱ्याला भारतीय सुरक्षा दलाबद्दल संवेदनशील माहिती दिली, असे अधिकाऱ्यांनी सांगितले.
कोण आहे जसबीर सिंग?
४१ वर्षीय जसबीर सिंग हा युट्यूब चॅनेल चालवतो. तो पंजाबमधील रोपर जिल्ह्यात असलेल्या महलान गावाचा आहे. तो सध्या रुपानगरमध्ये राहतो. त्यांच्या युट्यूबवरील फोटोवर माझा शेतकऱ्यांना पाठिंबा असा हॅशटॅग आहे.
जसबीर सिंग १.१ मिलियन सबस्क्रायबर असलेले जानमहल व्हिडीओ हे चॅनेल चालवतो. या चॅनेलवर तो मुख्यतः पर्यटनाबद्दलचे व्हिडीओ टाकतो. त्याने मलेशिया, मालदीव, थायलंड आणि इतर देशातील भटकंतीचे व्हिडीओ टाकलेले आहेत.
जसबीर सिंगचे इन्स्टाग्रामवर ४२००० फॉलोअर्स आहेत. इन्स्टाग्रामवरील बायोमध्ये त्याने फूड व्लॉगर असे लिहिलेले आहे. त्याने दोन दिवसांपूर्वी शेवटची पोस्ट अपलोड केलेली आहे. त्याचा मुलगा मुंबई इंडियन्स विरूद्धच्या सामन्यात पंजाबचा विजय झाल्याचा आनंद व्यक्त करतानाचा हा व्हिडीओ आहे.
ज्योती मल्होत्रासोबत संपर्क
पंजाबचे पोलीस महासंचालक गौरव यादव यांनी जसबीर सिंगला अटक झाल्याच्या वृत्ताला दुजोरा दिला आहे. जसबीर सिंग ज्योती मल्होत्रासोबतही संपर्कात होता, असेही त्यांनी सांगितले. ज्योती मल्होत्राला १५ मे २०२५ रोजी पाकिस्तानसाठी हेरगिरी केल्याच्या प्रकरणात अटक झालेली आहे.