Raja Raghuwanshi Murder Case: मेघालयात हत्या झालेल्या राजा रघुवंशी हत्या प्रकरणात रोज नवे खुलासे होत आहेत. राजाची पत्नी सोनम रघुवंशी हिनेच प्रियकरासह मिळून त्याची हत्या केली. राजाच्या हत्येनंतर त्याचा मृतदेह दरीत फेकण्यात आला होता. मृतदेह सापडल्यापासून सोनम बेपत्ता होती. तब्बल १७ दिवस गायब असलेली सोनम पोलिसांना उत्तर प्रदेशातील एका ढाब्यावर सापडली. पोलिसांच्या चौकशीत सोनम हत्येनंतर पुन्हा मध्य प्रदेशात आल्याची धक्कादायक माहिती समोर आली आहे. १४ दिवस सोनम इंदौरमध्ये एका घरात राहत होती.
हनिमूसाठी मेघालयात जाऊन पती राजा रघुवंशीची हत्या करणाऱ्या सोनमने गुन्ह्याची कबुली दिली आहे. मेघालय पोलिसांनी दिलेल्या माहितीनुसार, सोनमने तिचा प्रियकर राज कुशवाहासह मिळून राजाला संपवले. पोलिसांसमोरच सोनमने सांगितले की तिने तिच्या पतीला मारण्याचा कट रचला होता. राजाला मारण्यासाठी, सोनमने राज कुशवाहाला ५०,००० रुपये दिले होते. त्या पैशातून राजसह विशाल सिंग, आनंद कुर्मी आणि आकाश राजपूत हे शिलाँगला गेले आणि तिच्यावर लक्ष ठेवू लागले.
राजा रघुवंशीच्या हत्येनंतर सोनम इंदौरला परत आली होती. तिने एक फ्लॅट भाड्याने घेतला होता आणि त्यात ती १४ दिवस लपून राहिली होती. सोनमला माहित होते की राजाच्या हत्येनंतर तिला लपून राहावे लागेल. म्हणूनच तिने महिनाभरापूर्वीच इंदौरमध्ये हा फ्लॅट भाड्याने घेतला होता. इंदौरमध्ये राहत असताना राज कुशवाहा सोनमला नियमितपणे भेटायला जायचा. सोनमला भेटल्यानंतर तो तिच्या वडिलांच्या प्लायवूड कारखान्यात जायचा आणि त्यामुळे त्याला ऑफिसला पोहोचण्यास उशीर व्हायचा. सोनमचा भाऊ गोविंद याने राजला उशीरा येण्याचे कारणही विचारले होते.
लपून बसलेली सोनम बंद खोलीत टीव्ही चालू करून राजाशी संबंधित बातम्या पाहत होती. ती एकदाही फ्लॅटमधून बाहेर पडली नाही आणि पती राजाशी संबंधित प्रत्येक बातमी पाहत होती. राज कुशवाहाने दुसऱ्याच्या नावाने ऑनलाइन ऑर्डर देऊन तिच्यासाठी एका महिन्याचे रेशन फ्लॅटमध्ये पाठवले होते. १४ दिवसांनी सोनम उत्तर प्रदेशातील रामपूरला रवाना झाली. राज कुशवाह हा मूळचा रामपूरचा आहे. राजाच्या हत्येच्या संदर्भात काही पुरावे सापडल्याचे सोनमला कळल्यानंतर तिने इंदौर सोडले.
दरम्यान, सोनम जेव्हा राजासोबत हनिमूनला गेली होती तेव्हा ती प्रियकर राज याच्या सतत संपर्कात होती. राजाच्या नजरेतून वाचण्यासाठी तिने तिच्या मोबाईलवर चॅटिंगसाठी काही खास आणि वेगळे अॅप्स डाउनलोड केले होते. तिन्ही कॉन्ट्रॅक्ट किलर जवळ राहावेत म्हणून ती सतत तिचे लोकेशन शेअर करत होती. लग्नाच्या काही दिवस आधीच सोनम आणि राजने राजाला संपवण्यासाठी मोठी तयारी केली होती. ऑनलाइन व्यवहार टाळण्यासाठी तिने ९ लाख रुपये सोबत घेतले होते.