राजस्थानमधील बाडमेर जिल्ह्यात एक धक्कादायक घटना घडली आहे. येथे एका महिलेने तिच्या मुलांची हत्या करून नंतर स्वत:ही जीवन संपल्याचा धक्कादायक प्रकार समोर आला आहे. बाडमेरमधील गंगासरा गावामधील एका महिलेने तिच्या दोन मुलांना टाकीत टाकून ठार मारले. त्यानंतर घरातील दागदागिने आणि पैसे जाळून स्वत:च्या मोबाईलमध्ये मृत्यूचा स्टेटस लावला. त्यानंतर पाण्याच्या टाकीमध्ये उडी मारून जीवन संपवले. या घटनेची माहिती मिळाल्यानंतर पोलिसांनी घटनास्थळी धाव घेत तिन्ही मृतदेह टाकीमधून बाहेर काढले. त्यानंतर ते मृतदेह शवागारात पाठवण्यात आले.
याबाबत बाडमेरमधील पोलीस अधिकारी किशन सिंह चारुण यांनी सांगितले की, गंगासरा गावात एका महिलेने आपल्या दोन्ही मुलांसह जीवन संपवल्याची खबर आम्हाला मिळाली. त्यानंतर पोलिसांनी तातडीने घटनास्थळी धाव घेतली. तिथे पाण्याच्या टाकीमध्ये तीन मृतदेह तरंगत असलेले आढळले. मृतांची ओखळ झीमो देवी, तिचा मुलगा संतोष आणि मुलगी भावना अशी पटली.
याबाबत झीमोदेवी यांच्या नातेवाईकांनी पोलिसांकडे तक्रार दिली आहे. त्यात मृत झीमोदेवी हिला तिचा पती आणि जाऊबाई सातत्याने त्रास देत होते. त्यामुळे तिने हे टोकाचे पाऊल उचलले, असा आरोप त्यांनी केला आहे. तसेच मृत महिलेने जीवन संपवण्यापूर्वी एक स्टेटस लावलं होतं. त्याचीही चौकशी करण्यात यावी, अशी मागणीही तिच्या नातेवाईकांनी केली आहे. तसेच रोख रक्कम आणि दागिने जाळण्याच्या प्रकाराची चौकशी करण्यात यावी, अशी मागणीही नातेवाईकांनी केली आहे.
तसेच मृत महिलेचा पती चीमाराम आणि तिच्या जावेकडून तिचा छळ केला जात होता. तसेच चीमाराम आणि तिच्या जावेमध्ये अनैतिक संबंध होते. या संबंधांना विरोध केल्याने तिचा छळ केला जात होता, असा आरोपही मृत महिलेच्या नातेवाईकांनी केला आहे.