पाटणा - बिहारमधील सहदेई बुजुर्ग येथे मोठी रेल्वे दुर्घटना घडली आहे. जोगबनी-आनंद विहार टर्मिनल सीमांचल एक्स्प्रेसचे 11 डबे रुळावरुन घसरले आहेत. यामध्ये 7 प्रवाशांचा मृत्यू झाला असून 24 जण जखमी झाले आहेत. मृत आणि जखमींचा आकडा वाढण्याची भीती व्यक्त केली जात आहे. मुख्यमंत्री नितीश कुमार यांनी रेल्वे दुर्घटनेबाबत दुःख व्यक्त केले आहे. रविवारी (3 फेब्रुवारी) पहाटे 3.58 वाजेच्या दरम्यान हा अपघात घडल्याची माहिती समोर आली आहे. ही एक्स्प्रेस जोगबनीहून दिल्लीच्या दिशेनं प्रवास करत होती. या भीषण दुर्घटनेप्रकरणी रेल्वे प्रशासनाकडून चौकशीचे आदेश देण्यात आले आहेत. घटनास्थळावर सध्या मदत आणि बचावकार्य सुरू आहे.
एनडीआरएफची टीम आणि रेल्वे प्रशासनाचे अधिकारी घटनास्थळावर हजर आहेत. मिळालेल्या माहितीनुसार, रेल्वे रुळाला मोठा तडा गेला आहे. मात्र अपघातामागील नेमके कारण अद्याप स्पष्ट झालेले नाही. अपघातात जखमी झालेल्या अनेकांची प्रकृती गंभीर आहे. दुर्घटना घडली त्यावेळेस काळोख असल्याच्या कारणामुळे मदत आणि बचाव कार्य उशिराने सुरू झाले, अशी माहिती समोर आली आहे.
दुसरीकडे, रेल्वेमंत्री पीयूष गोयल यांनीही ट्विट करत दुर्घटनेबाबतची माहिती दिली.
मृतांच्या कुटुंबीयांना 4 लाख रुपये आणि जखमींना 50,000 रुपयांच्या आर्थिक मदतीची घोषणा.