Rain Viral Video:गुजरातमधील भावनगर जिल्ह्यात पावसाने अक्षरशः कहर केला. जिल्ह्यातील शिहोर तालुक्यात अतिवृष्टी सदृश्य पाऊस झाला असून, अनेक गावांमध्ये पाणी शिरले आहे. अनेक ठिकाणी रस्ते कालव्यासारखे वाहू लागले. दुचाकी, रिक्षाही या पाण्यात वाहून जातान दिसल्या.
'लोकमत'चं WhatsApp चॅनल फॉलो करा!
गुजरातमधील भावनगर जिल्ह्यात पावसामुळे गंभीर परिस्थिती निर्माण झाली. जिल्ह्यातील शिहोर तालुक्यात काही तुफान पाऊस झाला. शिहोरमधील घांचीवाड परिसरात रिक्षा आणि अन्य वाहने पावसात अडकली. शिहोरमध्येही रस्ते पाण्याखाली गेले.
पाण्यात वाहून लागली वाहने
शिहोर येथील एक व्हिडीओ सोशल मीडियावर व्हायरल होत आहे. या व्हिडीओमध्ये रिक्षा आणि इतर काही वाहने अगदी कचऱ्यासारखी वाहून जाताना दिसत आहे.
काही गावामध्ये पाणी शिरल्यामुळे शाळेतील मुलं आणि लोक अडकले आहेत. मुलाना आणि गावकऱ्यांना सुरक्षितपणे बाहेर काढण्यासाठी मदत मोहीम सुरू करण्यात आली आहे. ३८ मुलांना सुरक्षित स्थळी हलवण्यात आले आहे. भावनगर पोलिसांनी याबद्दलची माहिती दिली.
शाळेतील मुले बसमधून घरी निघाली होती. पण, रस्त्यात पाणी वाढलं. त्यामुळे बस चालकाने वाहन पुढे न नेण्याचा निर्णय घेतला. मुलांना बाहेर काढून एका घरात ते गेले. पण, पाण्याची पातळी वाढत गेली. दरम्यान, याची माहिती जिल्हा प्रशासन आणि पोलिसांना दिली गेली. त्यानंतर सर्वांना सुखरुपपणे बाहेर काढण्यात आले.