ध्वजवंदन करून येणाºया विद्यार्थिनीवर बलात्कार

स्वातंत्र्य दिनाच्या सोहळ्यावरून परतत असताना एका आठवीच्या विद्यार्थिनीवर बलात्कार झाल्याची घटना चंदीगडमध्ये घडली आहे.

चंदीगड : स्वातंत्र्य दिनाच्या सोहळ्यावरून परतत असताना एका आठवीच्या विद्यार्थिनीवर बलात्कार झाल्याची घटना चंदीगडमध्ये घडली आहे. पीडित विद्यार्थिनीच्या तक्रारीनंतर या प्रकरणी गुन्हा दाखल करण्यात आला असून, पोलीस आरोपीचा शोध घेत आहेत.
मिळालेल्या माहितीनुसार, चंदीगडच्या सेक्टर २३मध्ये सकाळी ११ वाजण्याच्या सुमारास ही घटना घडली. पीडित विद्यार्थिनी येथील एका सरकारी शाळेत शिकते. शाळेतून ध्वजवंदन करून परतत असताना आरोपीने तिचे अपहरण केले. चिल्ड्रन पार्कमध्ये नेऊन तिच्यावर बलात्कार केला.
आरोपीच्या तावडीतून सुटका करून पीडित विद्यार्थिनी घरी पोहोचली. तिने घडलेला प्रकार सांगितल्यानंतर कुटुंबीयांनी तत्काळ १०० नंबरवर फोन करून घटनेची माहिती पोलिसांना दिली.
या प्रकरणी पोलिसांनी प्रोटेक्शन आॅफ चिल्ड्रन फ्रॉम सेक्शुअल (पॉक्सो) अ‍ॅक्ट आणि अन्य कलमांतर्गत गुन्हा दाखल केला आहे. पीडितेला वैद्यकीय तपासणीसाठी रुग्णालयात पाठवण्यात आले आहे. आरोपी फरार असून, पोलीस त्याचा कसून शोध घेत आहेत.