Rajyasabha Election 2026 : देशभरातील 10 राज्यांमध्ये झालेल्या राज्यसभा निवडणुकांचे अंतिम निकाल जाहीर झाले असून, भाजपच्या नेतृत्वाखालील एनडीएला मोठा विजय झाला आहे. एनडीएने 37 जागांपैकी 22 जागांवर विजय मिळवत वरच्या सभागृहातील आपली ताकद वाढवली आहे. मात्र, या मोठ्या यशानंतरही भाजपला स्वतःच्या बळावर बहुमत मिळवण्यासाठी अजूनही 16 जागांची आवश्यकता आहे.
भाजपची ताकद वाढली, पण बहुमत अजून दूर
निवडणुकीपूर्वी राज्यसभेत भाजपचे 103 सदस्य होते. त्यापैकी 9 सदस्यांचा कार्यकाळ संपल्याने संख्या 94 वर आली होती. मात्र, या निवडणुकीत भाजपने 13 जागा जिंकून आपली एकूण संख्या 107 वर नेली आहे. यामुळे भाजपच्या जागांमध्ये वाढ झाली असली तरी, 245 सदस्यांच्या राज्यसभेत बहुमतासाठी लागणाऱ्या 123 आकड्यापासून भाजप अजूनही 16 जागांनी दूर आहे.
एनडीएला स्पष्ट बहुमत
या निवडणुकीनंतर एनडीएची एकूण ताकद 141 सदस्यांपर्यंत पोहोचली आहे. त्यामुळे एनडीएला राज्यसभेत स्पष्ट बहुमत मिळाले आहे. एनडीएमध्ये भाजपसोबतच एआयएडीएमके (5), जेडीयू (4), एनसीपी (4), टीडीपी (2), शिवसेना (2) यांसारख्या पक्षांचा समावेश आहे. तसेच 6 मनोनीत सदस्यांचा पाठिंबाही एनडीएला आहे.
विरोधकांना फटका
या निवडणुकीत विरोधकांना मात्र मोठा धक्का बसला आहे. ‘इंडिया’ आघाडीची एकूण संख्या 74 वर आली आहे. विरोधकांमध्ये काँग्रेसकडे 28, टीएमसीकडे 13 आणि डीएमकेकडे 8 जागा आहेत. इतर पक्षांची ताकद मर्यादित राहिली आहे. निवडणुकीपूर्वीच्या तुलनेत विरोधकांची स्थिती कमकुवत झाली आहे.
निवडणुकीचे चित्र
37 पैकी 26 सदस्य आधीच बिनविरोध निवडून आले होते. उर्वरित 11 जागांसाठी मतदान झाले. हरियाणा, बिहार आणि ओडिशा या राज्यांतील 11 जागांपैकी एनडीएने 9 जागांवर विजय मिळवला, तर विरोधकांना केवळ 2 जागा मिळाल्या.
भाजपला बहुमतासाठी अजून वाट पाहावी लागणार
भाजपला राज्यसभेत स्वतःच्या बळावर बहुमत मिळवण्यासाठी किमान 16 जागांची गरज आहे. ही भरपाई करण्यासाठी पक्षाला 2026 मधील आगामी निवडणुका तसेच 2028 पर्यंत वाट पाहावी लागू शकते.
बहुमताचे महत्त्व काय?
राज्यसभेत बहुमत असल्यास केंद्र सरकारला विधेयके मंजूर करणे अधिक सोपे होते. विशेषतः आर्थिक विधेयकांसाठी दोन्ही सभागृहांचे सहकार्य आवश्यक असते. लोकसभेसोबत राज्यसभेतही मजबूत स्थिती असल्यास सरकारला धोरणात्मक निर्णय आणि कायदे जलदगतीने राबवता येतात.
Web Summary : BJP's Rajya Sabha seat count rises to 107 after recent elections. NDA secures majority with 141 seats, but BJP needs 16 more for sole control. Opposition weakened. Wait till 2026 or 2028 for majority.
Web Summary : हालिया चुनावों के बाद राज्यसभा में भाजपा की सीटें बढ़कर 107 हुईं। एनडीए को 141 सीटों के साथ बहुमत मिला, लेकिन भाजपा को अकेले बहुमत के लिए 16 और सीटें चाहिए। विपक्ष कमजोर हुआ। बहुमत के लिए 2026 या 2028 तक इंतजार।