पुणे : सिरम इन्स्टिट्यूटने ‘कोविशिल्ड’ लसीच्या आपत्कालीन वापरासाठी सोमवारी अर्ज केला. याबाबतची माहिती सिरम इन्स्टिट्यू आॅफ इंडियाचे मुख्य कार्यकारी अधिकारी आदर पुनावाला यांनी ट्विट करुन दिली. केंद्र सरकारकडून परवानगी मिळाल्यास लसीकरण प्रक्रियेला गती मिळू शकणार आहे.
इंग्लंडमधील आॅक्सफर्ड विद्यापीठ आणि अॅस्ट्राझेनिकातर्फे विकसित केल्या जाणाऱ्या कोरोनावरील ‘कोव्हिशिल्ड’ लसींचे उत्पादन सुुरु आहे. सध्या सिरममध्ये दर महिन्याला ५ ते ६ कोटी डोस तयार होत आहेत. जानेवारीपासून १० कोटी डोसचे उत्पादन केले जाणार आहे. लस उत्पादन प्रक्रियेचा आढावा घेण्यासाठी पंतप्रधान नरेंद्र मोदी यांनी २८ नोव्हेंबर रोजी सिरम इन्स्टिट्यूटला भेट दिली होती.
आपत्कालीन परिस्थितीत ‘कोव्हिशिल्ड’ लसीच्या वापरासाठी येत्या दोन आठवड्यांमध्ये औषध महानियंत्रकांकडे अर्जाद्वारे मागणी करणार असल्याचे मोदी यांच्या भेटीनंतर आदर पुनावाला यांनी स्पष्ट केले होते. त्यानुसार सोमवारी केंद्र सरकारकडे परवानगी मागितल्याची माहिती पुनावाला यांनी व्टिट करुन दिली. यापूर्वी फायझर या अमेरिकेतील कंपनीने दोन दिवसांपूर्वी केंद्र सरकारकडे आपत्कालीन परिस्थितीत लसीच्या वापराला परवानगी द्यावी, अशी मागणी केली आहे.
‘सर्वांना दिलेल्या शब्दानुसार, २०२० हे वर्ष संपण्यापूर्वी सिरमने भारतात तयार होत असलेल्या ‘कोव्हिशिल्ड’ या पहिल्यावहिल्या कोरोनावरील लसीच्या आपत्कालीन वापरासाठी परवानगी मागितली आहे. यामुळे हजारो जणांचे प्राण वाचू शकणार आहेत. आम्हाला मिळत असलेल्या भरघोस पाठिंब्याबाबत मी केंद्र सरकार आणि पंतप्रधान नरेंद्र मोदी यांचे आभार मानतो’, असे पुनावाला यांनी व्टिटमध्ये म्हटले आहे.
कोरोनावरील लस वितरणासाठी सिरमकडून भारतालाच प्राधान्य दिले जाणार आहे. जुलै २०२१ पर्यंत केंद्र सरकारला ३० ते ४० कोटी डोस पुरवण्याचे लक्ष्य सिरम इन्स्टिट्यूटसमोर आहे. त्यादृष्टीने उत्पादन प्रक्रियेला गती दिली जाणार आहे.