बलवंत तक्षक -
सिरसा : हरयाणामध्ये भाजप सरकारमुळे बेकारी, भ्रष्टाचार, महागाई या समस्यांनी जनता त्रस्त झाली आहे. याचे परिणाम भाजपला भोगावे लागतील, अशी टीका काँग्रेसच्या सरचिटणीस प्रियांका गांधी यांनी गुरुवारी केली. हरयाणामध्ये काँग्रेसची मोठी लाट आल्याचा दावा त्यांनी केला. प्रियांका गांधी यांनी सोशल मीडियावरील एका पोस्टमध्ये म्हटले आहे की, हरयाणात भाजपमुळे राजकीय अस्थैर्य निर्माण झाले आहे. त्या गोष्टीला आता जनता कंटाळली आहे.
हरयाणामधील लोकसभेच्या सर्व जागा काँग्रेस जिंकेल, असा दावा त्यांनी केला. सिरसा लोकसभा मतदारसंघातून निवडणूक लढवत असलेल्या काँग्रेसच्या उमेदवार कुमारी सेलजा यांच्या प्रचारासाठी प्रियांका गांधी यांनी गुरुवारी रोड शोही केला.
हरयाणातील लोकसभा निवडणुकांच्या प्रचारात प्रियांका गांधी यांनी केलेला हा पहिलाच रोड शो होता. त्यामध्ये सहभागी झालेले काँग्रेसचे कार्यकर्ते प्रियांका गांधी यांच्यावर फुलांचा वर्षाव करत होते तसेच काँग्रेस पार्टी झिंदाबाद अशा घोषणा देत होते. सुमारे एक तास हा रोड शो सुरू होता.