'ऑपरेशन सिंदूर सुरूच...' लष्करप्रमुख जनरल द्विवेदी यांनी नवीन वर्षाच्या पहिल्याच दिवशी पाकिस्तानला करून दिली आठवण

भारतीय लष्कराने नवीन वर्षाच्या निमित्ताने देशवासियांना शुभेच्छा दिल्या आहेत. तसेच पाकिस्तानलाही कडक संदेश दिला आहे. लष्करप्रमुख द्विवेदी यांनी पाकिस्तानला स्पष्ट इशारा दिला आहे.

मागील वर्षी पाकिस्तान विरोधात भारताने 'ऑपरेशन सिंदूर' राबवले. यामध्ये भारतीय लष्कराने पाकिस्तानमधील ११ दहशतवाद्यांच्या ११ अड्ड्यांवर हल्ले केले. अनेक दहशतवाद्यांचा खात्मा केला. आज पासून २०२६ हे नवीन वर्ष सुरू झाले आहे. नव्या वर्षानिमित्त भारतीय लष्कर प्रमुख जनरल उपेंद्र द्विवेदी यांनी पाकिस्तानला कडक इशारा दिला आहे.

'हा देश सर्वांचा; धर्म, जात, भाषा आणि प्रदेशाच्या आधारे भेदभाव होऊ नये'- मोहन भागवत

लष्कर प्रमुख (COAS) जनरल उपेंद्र द्विवेदी यांनी गुरुवारी देशाला नवीन वर्षाच्या शुभेच्छा दिल्या. त्यांनी 'ऑपरेशन सिंदूर' अंतर्गत भारताच्या जलद कारवाईचे कौतुक केले आणि सांगितले की ही कारवाई अजूनही सुरू आहे. एका पोस्टमध्ये जनरल उपेंद्र द्विवेदी यांनी लिहिले की, भारतीय सैन्य दशकभर परिवर्तनाच्या काळातून जात आहे. त्यांनी संयुक्तता, स्वावलंबन आणि नवोपक्रम हे भारताच्या संरक्षण धोरणाचे आधारस्तंभ असल्याचे वर्णन केले. भविष्यासाठी सैन्याला तयार करण्यासाठी स्वदेशी तंत्रज्ञान आणि नवीन कल्पनांचा अवलंब करण्याचे आवाहन द्विवेदी यांनी केले.

लष्करप्रमुख म्हणाले, "२०२६ या शुभ प्रसंगी, भारतीय सैन्याच्या वतीने, मी सर्व नागरिकांना हार्दिक शुभेच्छा देतो. हे नवीन वर्ष तुम्हाला आणि तुमच्या कुटुंबियांना आनंद, चांगले आरोग्य आणि समृद्धी घेऊन येवो. भारतीय सैन्य अत्यंत दक्षता आणि दृढनिश्चयाने राष्ट्राची सुरक्षा सुनिश्चित करत आहे."

'ऑपरेशन सिंदूर' बाबत बोलताना जनरल द्विवेदी म्हणाले की, गेल्या वर्षी ऑपरेशन सिंदूरने शत्रूच्या नापाक कारस्थानांना दृढ आणि निर्णायक कारवाईद्वारे योग्य उत्तर दिले. हे ऑपरेशन आजही सुरू आहे. सीमेवर दक्षता राखण्यासोबतच, देशातील आपत्तींना जलद प्रतिसाद देऊन आणि राष्ट्र उभारणीच्या प्रयत्नांद्वारे लष्कराने राष्ट्रीय प्रगतीत महत्त्वाची भूमिका बजावली आहे, असंही ते म्हणाले. भारताने ७ मे २०२५ रोजी पहलगाम दहशतवादी हल्ल्याला प्रत्युत्तर म्हणून ऑपरेशन सिंदूर सुरू केले, यामध्ये २६ लोकांचा मृत्यू झाला होता. या कारवाईत पाकिस्तान आणि पाकव्याप्त जम्मू आणि काश्मीरमधील दहशतवादी छावण्यांना लक्ष्य करण्यात आले.