आमबासा (त्रिपुरा) : कुशासनासाठी ओळखल्या जाणाऱ्या जुन्या भिडूंनी हातमिळवणी केली आहे, असे टीकास्त्र पंतप्रधान नरेंद्र मोदी यांनी शनिवारी त्रिपुरातील काँग्रेस-मार्क्सवादी कम्युनिस्ट पक्ष (माकपा) युतीवर सोडले. धलाई जिल्ह्यातील आमबासा येथे निवडणूक प्रचार सभेला संबोधित करताना मोदी बोलत होते.
टिपरा मोथा या प्रादेशिक पक्षाचे नाव न घेता मोदी म्हणाले की, इतर अनेक पक्षही विरोधी आघाडीला अप्रत्यक्षपणे मदत करत आहेत ; परंतु, त्यांना दिलेले प्रत्येक मत त्रिपुराला अनेक वर्षे मागे लोटेल. काँग्रेस आणि डाव्यांना लोकांच्या फायद्याच्या सर्व योजना ठप्प करायच्या आहेत, अशी टीका माेदींनी केली.
चांगल्या पायाभूत सुविधा देण्यासाठी प्रयत्नशील बंगळुरू : आपले सरकार चांगल्या पायाभूत सुविधा उपलब्ध करण्यासाठी नेहमीच कठोर परिश्रम करेल, असे पंतप्रधान नरेंद्र मोदी यांनी शनिवारी सांगितले. कर्नाटकचे मुख्यमंत्री बसवराज बोम्मई यांनी बंगळुरू- म्हैसूर एक्स्प्रेस कॉरिडॉरवर केलेले ट्वीट रिट्वीट करून मोदी म्हणाले की, केंद्र सरकार चांगल्या पायाभूत सुविधा देण्यासाठी कठोर परिश्रम करत असून आपले सरकार नेहमीच हे करेल. बंगळुरू व म्हैसूर दरम्यानच्या १० पदरी महामार्गाच्या उड्डाणपुलाखालून वंदे भारत एक्स्प्रेस जात असल्याचा व्हिडीओ ड्रोनने टिपला आहे.