अहिंसा, गरिबीचे उच्चाटन, सर्वश्रेष्ठ भारत - पंतप्रधान मोदींचा मंत्र

स्वातंत्र्यदिनाच्या मुहुर्तावर मोदींनी तीन महत्त्वपूर्ण योजनांची घोषणा केली. जन धन योजनेच्या माध्यमातून देशातील प्रत्येक गरिबाच्या नावाने बँक खाते सुरु करण्यात येईल. बँक खाते उघडताच प्रत्येक गरिबाला एक लाख रुपयांचा विमा दिली जाईल. संसद ग्रामविकास योजनेच्या माध्यमातून देशातील गावांचा विकास केला जाईल. २०१६ मध्ये या योजनेची अंमलबजावणी केली जाणार असून योजनेची ब्लू प्रिंट ११ ऑक्टोंबरला जयप्रकाश नारायण यांच्या जयंतीला दिली जाईल. या योजनेनुसार प्रत्येक खासदाराने त्यांच्या भागातील एका गावाची निवड करुन त्या गावाचा सर्वांगिण विकास करावा. दरवर्षी एका गावाचा विकास असा संकल्प प्रत्येक खासदाराने करावा असे मोदींनी सांगितले. 

 

स्त्रीभ्रूण हत्येचा विरोध दर्शवताना मोदी म्हणाले, डॉक्टरांनी विज्ञानाचा वापर स्वतःची तिजोरी भरण्यासाठी करु नये. माता - भगिनींनी मुलाच्या आशेने स्त्रीभ्रूण हत्येचा मार्ग स्वीकारु नये. स्त्रीशक्तीचे उदाहरण देत मोदी म्हणाले, पाच - पाच मुल असूनही आईवडिलांना वृद्धाश्रमात राहावे लागले. तर केवळ एक मुलगी असून त्या मुलीने लग्न न करता आईवडिलांची सेवा केल्याचे मी बघितले आहे. राष्ट्रकुलस्पर्धेत निम्मे पदकं मुलींनीच मिळवून दिल्याची आठवण त्यांनी करुन दिली. मुलींवर निर्बंध घालणा-या पालकांनी मुलांवरही तेवढेच निर्बंध घालायला हवे असे मोदींनी स्पष्ट केले.

 

भारतात पर्यटनावर भर देण्याची गरज आहे. मात्र अस्वच्छता ही पर्यटनातील प्रमुख अडचण आहे. स्वच्छतेसाठी फक्त सरकार काम करु शकत नाही. यासाठी जनसहभाग हवा असे मोदींनी म्हटले. गावातील महिलांना आजही उघड्यावर शौचासाठी जावे लागते हे दुर्दैव असून यामुळे त्या माताभगिनींनी आजारही होऊ शकतात असे त्यांनी नमदू केले. २०१९ पर्यंत आपण भारताला स्वच्छ करुया असा संकल्पही मोदींनी केला. तर प्रत्येक शाळेत स्वच्छतागृह असेल यासाठी विशेष मोहीम राबवली जाईल अशी घोषणाही मोदींनी केली. 

 

शस्त्र आणि सत्तेशिवाय स्वातंत्र्यलढ्यातील महान नेत्यांनी परराष्ट्र शक्तींना देशातून पळवून लावले. तर मग आता आपण सर्व मिळून गरिबीविरोधात लढा देऊ असा निर्धार मोदींनी केला.