२०५० पर्यंत सर्वाधिक मुस्लिम भारतात

२०५० मध्ये जगभरात लोकसंख्येनुसार हिंदू तिस-या स्थानावर येणार असून भारत इंडोनेशियाला मागे टाकत सर्वाधिक मुस्लिम लोकसंख्या असलेला देश बनणार आहे.

ऑनलाइन लोकमत 

वॉशिंग्टन, दि. ३ - २०५० मध्ये जगभरात लोकसंख्येनुसार हिंदू तिस-या स्थानावर येणार असून भारत इंडोनेशियाला मागे टाकत सर्वाधिक मुस्लिम लोकसंख्या असलेला देश बनणार आहे. एका संस्थेने केलेल्या अहवालात हा अंदाज व्यक्त करण्यात आला आहे. 

प्यू संशोधन केंद्राने नुकताच एक अहवाल प्रकाशित केला असून यामध्ये जगभरातील प्रमुख धर्मांचा सखोल अभ्यास करण्यात आला आहे.  जगभरात हिंदूची  संख्या आजच्या तुलनेत ३४ टक्क्यांपर्यंत वाढेल असा कयास या अहवालात वर्तवण्यात आला आहे. २०५० पर्यंत जगात हिंदूचे प्रमाण १४.२ टक्के एवढे असेल. त्याखालोखाल कोणत्याही धर्माचे अनुकरण न करणा-यांचा नंबर लागेल. हे प्रमाण १३.२ टक्के एवढे असेल. आगामी चार दशकात ख्रिश्चन धर्म हा पहिल्या स्थानावरच असेल. पण या कालावधीत मुस्लिम धर्मीयांच्या लोकसंख्येतही झपाट्याने वाढ होईल असे या अहवालात म्हटले आहे. २०५० मध्ये मुसलमानांची लोकसंख्या २.८ अब्ज  (एकूण लोकसंख्येच्या ३० टक्के) ऐवढी असेल. तर ख्रिश्चनांची लोकसंख्या २.९ अब्ज (एकूण लोकसंख्येच्या ३१ टक्के) ऐवढी असेल. बौद्ध धर्मीयांच्या लोकसंख्येत फारशी वाढ होणार नाही असे या अहवालात नमूद करण्यात आले आहे.   

२०५० मध्येही भारतात हिंदूंची लोकसंख्या सर्वाधिक असेल. पण तोपर्यंत देशात मुस्लिमांची लोकसंख्याही वाढेल. २०५० मध्ये भारत इंडोनेशियाला मागे टाकून सर्वाधिक मुस्लिम लोकसंख्या असलेला देश बनेल असा या अहवालात म्हटले आहे.