उत्तर प्रदेशातील चौरीचोरा भागातील एका अल्पवयीन मुलीवर बलात्कार केल्याची धक्कादायक घटना समोर आली आहे. संबंधित आरोपीने घडलेला सर्व प्रकार कुणालाही न सांगण्याची धमकी दिली होती. त्यामुळे घाबरुन पीडित मुलीने कुटुंबाला या घटनेची माहिती दिली नाही, असं पीडित मुलीने सांगितले आहे.
दोन दिवसांपूर्वी पीडित मुलीची प्रकृती अचानक बिघडल्यामुळे आई- वडिलांनी तपासणी करण्यासाठी डॉक्टरांकडे घेऊन गेले होते. डॉक्टरांनी तपासणी केल्यानंतर पीडित मुलगी गर्भवती असल्याची माहिती समोर आली. डॉक्टरांनी दिलेली माहिती ऐकून आई- वडिलांना देखील जबर धक्का बसला. यानंतर पीडित मुलीने शेतात तिच्यासोबत अत्याचार झाल्याची माहिती आईला सांगितली. मुलीसोबत झालेल्या घटनेची सर्व माहिती ऐकल्यानंतर मुलीच्या आईने पोलीस स्टेशनमध्ये जाऊन गुन्हा दाखल करण्याचा निर्णय घेतला.
दोन महिन्यांपूर्वी जेव्हा ती एकटी चारा कापण्यासाठी शेतात गेली होती. तेव्हा ओमप्रकाश नावाच्या नराधामाने तिच्यावर बलात्कार केला असल्याचा आरोप पीडित मुलीने केला आहे. आरोपी ओमप्रकाशला पोलिसांनी ताब्यात घेतले असून गुन्हा दाखल करण्यात आला आहे.