हवाई दलाचे मिग-21 विमान ग्वाल्हेरमध्ये कोसळले 

हवाई दलाचे एक मिग 21 ट्रेनर विमान आज ग्वाल्हेरमध्ये अपघातग्रस्त झाले.

ग्वाल्हेर (मध्य प्रदेश) - हवाई दलाचे एक मिग 21 ट्रेनर विमान आज ग्वाल्हेरमध्ये अपघातग्रस्त झाले. मात्र विमानात असलेले दोन्ही वैमानिक संभाव्य धोका ओळखून वेळीच बाहेर पडल्याने दोन्ही पायलट सुखरूप बचावले. विमानाने नियमित सरावासाठी उड्डाण केले असताना हा अपघात झाला. 

अपघातग्रस्त विमानामध्ये एक ग्रुप कॅप्टन आणि एक स्क्वॉड्रन लीडर असे दोन वैमानिक होते. मात्र अपघातावेळी योग्य प्रसंगावधान राखल्याने ते बचावले. यंदाच्या वर्षात मिग 21 विमानाला अपघात होण्याची ही तिसरी वेळ आहे. 

याआधी फेब्रुवारी महिन्यात भारताच्या हद्दीत घुसून हल्ला करण्याचा प्रयत्न करणाऱ्या पाकिस्तानी विमानांना पिटाळून लावताना विंग कमांडर अभिनंदन यांचे मिग-21 विमान अपघातग्रस्त झाले होते. तर मार्च महिन्यात राजस्थानमधील बिकानेर येथे एक मिग-21 विमान कोसळले होते.