नवी दिल्ली - राजस्थानच्या जयपूरमध्ये एक अनोखी घटना समोर आली आहे. ब्रेन सर्जरी दरम्यान एक रुग्ण गायत्री मंत्र म्हणत असल्याचं समोर आलं आहे. सीनियर न्यूरोसर्जन डॉ. केके बंसल यांच्या मार्गदर्शनाखाली जयपूरच्या नारायण रुग्णालयात न्यूरो सर्जरी टीमला मोठं यश आलं आहे. 57 वर्षीय रिधमल राम यांच्या मेंदूतील ट्यूमर यशस्वीरित्या काढण्यात आला आहे. या रुग्णाला सतत चक्कर येत असे. या काळात त्यांचा आवाजदेखील बंद होत असे. याबाबत वैद्यकीय चाचण्या केल्यानंतर त्यांना ब्रेन ट्यूमर असल्याचं डॉक्टरांच्या लक्षात आलं.
ब्रेन ट्यूमर काढण्यासाठी चार तास सर्जरी करण्यात आली. मात्र सर्जरी दरम्यान रुग्ण गायत्री मंत्राचा जप करत होता. जयपूरच्या नारायण रुग्णालयाच्या जोनल क्लिनिकल डायरेक्टर डॉ. माला ऐरुन यांनी चार तासाच्या सर्जरीमध्ये एक हाय एंड ऑपरेटिंग मायक्रोस्कोपचा समावेश असल्याचं म्हटलं आहे. अशा प्रकराची सर्जरी ही देशातील फारच कमी ठिकाणी केली जाते. तसेच ही करण्यासाठी उच्च स्तरीय तज्ज्ञांची आवश्यकता असते. चुरूचे रहिवासी असलेल्या रिधमल राम यांना वारंवार चकर येत होती.
चाचण्या केल्या असता रिपोर्टमध्ये ब्रेनच्या स्पीच एरियामध्ये ब्रेन ट्यूमर असल्याचं समोर आलं. यामुळे या भागात थोडी जरी इजा झाली असती, तरी या व्यक्तीची बोलण्याची आणि ऐकण्याची क्षमताच निघून गेली असती. त्यासाठी सर्जरी सुरू असतानाही रुग्ण नीट बोलत आहे आणि त्याला सर्व नीट ऐकू येत आहे हे महत्त्वाचं होतं. म्हणूनच त्यांना गायत्री मंत्राचा जप करायला सांगितला होता. न्यूरो सर्जरी करणाऱ्या टीमने ब्रेन ट्यूमरची यशस्वी सर्जरी केली आहे. एका हिंदी वेबसाईटने याबाबतचे वृत्त दिले आहे.
काही महिन्यांपूर्वी आंध्र प्रदेशमध्ये अशीच एक घटना घडली होती. एका रुग्णाची ओपन ब्रेन सर्जरी करायची होती. मात्र ऑपरेशनच्या वेळी रुग्णाला झोपायची परवानगी नव्हती अशा परिस्थितीत डॉक्टरांनी अनोखी शक्कल लढवली. रुग्णाला त्याचा आवडता टीव्ही शो 'बिग बॉस' आणि हॉलिवूड चित्रपट 'अवतार' दाखवला. आश्चर्याची गोष्ट म्हणजे रुग्ण या गोष्टी लॅपटॉपवर पाहत असेपर्यंत शस्त्रक्रिया करण्यात आली होती. ओपन ब्रेन शस्त्रक्रियेद्वारे रुग्णाच्या मेंदूत डाव्या बाजूला असलेल्या प्रीमोटर क्षेत्रातील ग्लिओमा काढून टाकायचा होता. यासाठी डॉक्टरांनी त्याला शस्त्रक्रिया संपेपर्यंत लॅपटॉपवर बिग बॉस आणि अवतार सिनेमा दाखवला होता.