Family burnt alive in car: केरळमधील कन्नूर जिल्हा रुग्णालयाजवळ गुरुवारी एका कारला आग लागल्याने गरोदर महिला आणि तिच्या पतीचा होरपळून मृत्यू झाल्याची धक्कादायक घटना घडली आहे. प्रसूती वेदना सुरू झाल्यामुळे पती आपल्या पत्नीला रुग्णालयात घेऊन जात होता, यावेळी अचानक कारला आग लागली. मागे बसलेल्या कुटुंबातील इतर सदस्यांना बाहेर काढण्यात यश आले मात्र जोडपे गाडीतून बाहेर पडू शकले नाहीत.
मिळालेल्या माहितीनुसार, प्राजित (35) आणि त्याची पत्नी रिशा (26, रा. कुट्टीअत्तूर) अशी मृतांची नावे आहेत. प्रसूती वेदना होत असल्याने महिलेला रुग्णालयात नेत असताना ही दुर्घटना घडली. घटनेची माहिती मिळताच अग्निशमन दल आणि बचाव अधिकारी घटनास्थळी पोहोचले आणि आग विझवून प्राजित आणि रिशाला बाहेर काढले, पण तोपर्यंत त्यांचा मृत्यू झाला होता.
कारमध्ये सहा जण असल्याची माहिती पोलिसांनी दिली. गाडीने पेट घेतला तेव्हा मुलासह मागील सीटवर बसलेल्या चार जणांना बाहेर काढण्यात यश आले. त्यांना रुग्णालयात दाखल करण्यात आले आहे. घटनास्थळी भेट दिल्यानंतर कन्नूर शहराचे पोलिस आयुक्त अजित कुमार यांनी पत्रकारांना सांगितले, इतरांना कोणतीही दुखापत झालेली नाही. रुग्णालयात त्यांची तपासणी करण्यात येत आहे.