केदारनाथ धामच्या यात्रेसाठी दररोज लाखो लोक उत्तराखंडला येत आहेत. अशा परिस्थितीत वाहतूक कोंडी होणं सामान्य आहे. इतक्या मोठ्या संख्येने प्रवाशांच्या आगमनामुळे हरिद्वारपासूनच वाहतूक कोंडी सुरू होते. केदारनाथला जाताना ही वाहतूक कोंडी टाळण्यासाठी काही प्रवाशांनी एक अनोखा मार्ग शोधला आणि प्रवासासाठी दोन रुग्णवाहिका बुक केल्या. हे लोक त्यांच्या योजनेत यशस्वीही होत होते. मात्र सोनप्रयागजवळ पोलिसांनी त्यांची हुशारी पकडली.
अनेकदा लोक वाहतूक कोंडी टाळण्यासाठी नवीन मार्ग अवलंबतात. पण या लोकांनी वाहतूक कोंडी टाळण्यासाठीच नव्हे तर शक्य तितक्या लवकर केदारनाथ धाम गाठण्यासाठीही शक्कल लढवली. वाहतूक कोंडी टाळण्यासाठी प्रवाशांनी दोन रुग्णवाहिका बुक केल्या आणि त्यात प्रवास करण्याचा प्लॅन केला. रुग्णवाहिकेत रुग्णाऐवजी प्रवासी केदारनाथ धामच्या यात्रेसाठी निघाले. १४ जून रोजी ही घटना घडली आणि सोशल मीडियावर जोरदार व्हायरल होत आहे.
असा उधळला डाव
या प्रवाशांना माहित होतं की, रुग्णवाहिका कोणीही थांबवणार नाही. म्हणूनच ते सर्व रुग्णवाहिकेचा सायरन वाजवत हरिद्वारहून गौरीकुंडला रवाना झाले. पण सोनप्रयागजवळ पोलिसांनी त्यांचा हा डाव उधळला. हरिद्वारपासून ऋषिकेश, व्यासी, देवप्रयाग, श्रीनगर, रुद्रप्रयाग, तिलवाडा, ऑगस्ट मुनी आणि गुप्तकाशी फाटा या ठिकाणी कडक पोलीस तपासणी सुरू आहे.
पोलिसांना आला संशय
सोनप्रयाग पोलिसांना संशय आला की, गौरीकुंड किंवा केदारनाथ येथून त्यांना कोणताही प्रवासी जखमी किंवा आजारी असल्याची कोणतीही माहिती मिळाली नव्हती. कारण अनेकदा केदारनाथ किंवा गौरीकुंडमध्ये जेव्हा कोणी जखमी किंवा आजारी पडतो किंवा इतर कोणतीही आपत्कालीन परिस्थिती उद्भवते तेव्हा सोनप्रयाग पोलिसांना तात्काळ कळवले जाते. अशा परिस्थितीत, पोलीस कर्मचाऱ्यांनी दोन्ही रुग्णवाहिका थांबवल्या. रुग्णवाहिकेचे दरवाजे उघडले तेव्हा पोलीस चकित झाले. कारण त्यात कोणीही जखमी किंवा आजारी व्यक्ती नव्हती. त्यात काही प्रवासी होते, जे वातानुकूलित रुग्णवाहिकेत आरामात बसले होते. ते कोणत्याही वाहतूक कोंडीत न अडकता गौरीकुंडकडे जात होते.