'मी लहान लहान मुलांना...', बंगळुरू चेंगराचेंगरीसंदर्भात बोलताना डीके शिवकुमार भावुक

"मी माझ्या डोळ्याने किमान 10 लोकांना प्राण सोडताना बघितले. कुठलेही कुटुंब हे नुकसान सहन करू शकत नाही."

रॉयल चॅलेन्जर्स बंगळुरू (RCB) संघ 18 वर्षांच्या प्रदीर्घ प्रतीक्षेनंतर आयपीएल विजेता बणला. यानिमित्त बेंगळुरूमध्ये वियोत्सवाचे आयोजन करण्यात आले होते. मात्र, या आयोजनाला दुर्घटनेचा डाग लागला. संघाच्या विजयी मिरवणुकीपूर्वी, चिन्नास्वामी स्टेडियमबाहेर झालेल्या चाहत्यांच्या गर्दीचे पर्यवसान चेंगराचेंगरीत झाले आणि या दुर्घटनेत 11 जणांचा मृत्यू झाला, तर 40 हून अधिक चाहते जखमी झाले आहेत. आता या संपूर्ण घटनेवर प्रतिक्रिया देताना कर्नाटकचे उपमुख्यमंत्री डीके शिवकुमार कॅमऱ्यासमोर भावुक झाले. 

यावेळी भावुक होताना डीके शिवकुमार म्हणाले, मला मुलांची चिंता आहे. त्या छोट्या छोट्या मुलांची. मी बघिते, ती 15 वर्षांची मुलं होती. मी माझ्या डोळ्याने किमान 10 लोकांना प्राण सोडताना बघितले. कुठलेही कुटुंब हे नुकसान सहन करू शकत नाही. 

शिवकुमार म्हणाले, पोलीस कमिश्नर यांनी मला 10 मिनिटांत कार्यक्रम संपवायला सांगितले होते. ते मला म्हणाले, एक किंवा दोन जणांचा मृत्यू झाला आहे, कार्यक्रम दहा मिनिटांत संपवावा लागेल. याशिवाय, या घटनेसंदर्भात माफी मागताना, अशा प्रकारची घटना भविष्यात घडणार नाही, यासाठी काम केले जाईल, असेही ते म्हणाले. याच वेळी त्यांनी भाजप राजकारण करत असल्याचा आरोपही केला. 

#WATCH | Bengaluru Stampede | Karnataka Dy CM DK Shivakumar says, "BJP is doing politics...We are very sorry for the incident. We will work out a better solution in the future..." pic.twitter.com/elp944ixlM

— ANI (@ANI) June 4, 2025

या दुर्घटनेसंदर्भात आलेल्या भाजपच्या प्रतिक्रियेसंदर्भात बोलताना शिवकुमार म्हणाले, यातून आपण प्रशासकीय धडा घ्यायला हवा. विरोधकांना मृतदेहांवर राजकारण करू द्या. ते किती मृतदेहांवर राजकारण करतात, मी पाहतो. पण लहान लहान मुलांना बघून अत्यंत वाईट वाटले. मी त्यांच्या वेदना बघितल्या.