कळमेश्वर....

दत्तक ग्राम योजनेची आढावा सभा

द�

��्तक ग्राम योजनेची आढावा सभा
ग्रामस्थांची पाठ : जि.प. सदस्यांनी घेतले सोनपूर गाव दत्तक
कळमेश्वर : तालुक्यातील सोनपूर (आदासा) येथे नुकतीच दत्तक ग्राम योजनेबाबत आढावा सभा पार पडली. या सभेत विविध विकास कामांबाबत चर्चा करण्यात आली.
सभेच्या अध्यक्ष म्हणून जि. प. सदस्या अरुणा मानकर तर प्रमुख अतिथी म्हणून सरपंच राजुसा धुर्वे, सदस्य अनुसया कडू, चार्ज अधिकारी टिंगरे, ग्रामसेवक प्रवीण वाटकर आदी उपस्थित होते. याप्रसंगी आरोग्य, पाणीपुरवठा, बांधकाम, शिक्षण, समाजकल्याण, बालकल्याण आदी विभागामार्फत उपाययोजना आखण्याचे ठरविण्यात आले. तर येथील मुख्य समस्या असलेली भूमिगत पाईपलाईन असून ती संपूर्णत: नव्याने टाकण्याची गरज लक्षात घेता त्या दिशेने कार्य करण्याचे यावेळी ठरविण्यात आले. आदासा हे गाव टेकडीच्या पायथ्याशी असून पावसाळ्यात टेकडीवरून खाली येणारे पाणी गावात शिरते. त्यामुळे संरक्षण भिंत बांधून पाणी गावाबाहेर काढणे अत्यावश्यक आहे. याबाबत शासन काय करू शकते, यावर चर्चा करण्यात आली. प्रास्ताविक चार्ज अधिकारी टिंगरे यांनी केले. आभार ग्रामसेवक प्रवीण वाटकर यांनी मानले.
विशेष म्हणजे, या सभेला स्थानिक ग्रामस्थांनी पाठ फिरविल्याचे दिसून आले. विविध विभागाचे अधिकारी, कर्मचारी मोठ्या संख्येने उपस्थित होते. परंतु गावातील नागरिकांची उपस्थिती मात्र बोटावर मोजण्या इतकीच होती.
१६०६ लोकसंख्या असलेल्या सोनपूर (आदासा) या गावाचा ६० टक्क्यांपेक्षा अधिक विकास अगोदरच साधल्या गेला आहे. यात १२ लाख रुपयांच्या निधीतून सांस्कृतिक भवन, दुकान गाळे, हौद आदी विकास कामे करण्यात आली. गावात अंतर्गत रस्त्यांचे सिमेंटीकरण भरपूर प्रमाणात झाले. आदासा देवस्थान परिसरासोबतच गावाच्या विकासात आ. सुनील केदार यांचा मोलाचा वाटा आहे. त्यामुळे जि.प. सदस्या अरुणा मानकर यांना हेच गाव दत्तक घेण्याची गरज का भासली, असा प्रश्न नागरिकांना पडला आहे. या गावाव्यतिरिक्त धापेवाडा पंचायत सर्कलमधील परसोडी (वकील), मढासावंगी, पिपळा (किनखेडे), भडांगी, खानगाव, हरदोली, बोरगाव (बुजुर्ग), धूरखेडा, निळगाव, वरोडा, सावळी, वाढोणा, झुनकी आदी गावे विकासाच्या प्रतीक्षेत असताना दत्तक ग्राम घेताना अशा गावांकडे दुर्लक्ष का करण्यात आले, असा संतप्त सवालही नागरिक करीत आहेत. (प्रतिनिधी)