Indian Army Action: पहलगाम दहशतवादी हल्ल्यानंतरही पाकिस्तानकडून सातत्याने भारतात घुसखोरीचे प्रयत्न केले जात आहेत. प्रत्येकवेळी भारतीय सैन्य हे घुसखोरीचे प्रयत्न हाणून पाडत आहे. दरम्यान, कालही (२९ जून २०२५) जम्मू आणि काश्मीरमधील राजौरी येथील नियंत्रण रेषेवर (एलओसी) दहशतवाद्यांनी घुसखोरीचा प्रयत्न केला, मात्र भारतीय सैनाने हा प्रयत्न उधळून लावला. या दरम्यान एका पाकिस्तानी गाईडला अटक करण्यात आल्याचे लष्कराने सांगितले.
मिळालेल्या माहितीनुसार, पाकिस्तानी दहशतवादी भारतात घुसखोरी करणार असल्याची गुप्त माहिती मिळाली होती. त्या आधारे भारतीय सैन्याने बीएसएफच्या सहकार्याने सापळा रचला. घुसखोरीचा प्रयत्न करणाऱ्या ४-५ सशस्त्र दहशतवाद्यांच्या हालचाली सैनिकांनी पाहिल्या. या संयुक्त कारवाईदरम्यान, एका व्यक्तीला अटक करण्यात आली. हा व्यक्ती पाकिस्तानी गाईड असून, तो घुसखोरीला मदत करत होता. या कारवाईत, पळून जाण्याचा प्रयत्न करताना जैशचे चार दहशतवादी जखमी झाले आहेत.
शोध मोहिमेदरम्यान मोबाईल आणि पाकिस्तानी चलन जप्तगाईडला अटक केल्यानंतर सैन्याने परिसरात शोध मोहीम राबवली. या दरम्यान मोबाईल फोन आणि पाकिस्तानी चलनासह अनेक संवेदनशील वस्तू जप्त करण्यात आल्या. अधिकाऱ्याने सांगितले की, सुरुवातीच्या चौकशीत अटक केलेल्या व्यक्तीने सांगितले की, तो नियंत्रण रेषेजवळील पीओकेचा रहिवासी असून, पाकिस्तानी लष्करी अधिकाऱ्यांच्या सूचनेनुसार काम करतो. या गाईडने पुष्टी केली की, जैश-ए-मोहम्मदचे दहशतवादी मोठ्या प्रमाणात शस्त्रे, दारुगोळ्यासह इतर आक्षेपार्ह साहित्य घेऊन भारतात येत होते.