"मी तुमचा सल्लागार नाही...!"; राहुल गांधींच्या विधानावर लोकसभा अध्यक्ष ओम बिर्ला भडकले; नेमकं काय घडलं?

लोकसभा अध्यक्ष ओम बिर्ला म्हणाले, "जे पुस्तकच प्रकाशितच झालेले नाही, त्याचा संदर्भ विरोधीपक्ष नेते सभागृहात देऊ शकत नाहीत." मात्र, यानंतरही राहुल गांधी वारंवार जनरल नरवणे यांच्या पुस्तकाचा उल्लेख करतच होते. दरम्यान गदारोळ एवढा वाढला की...

सध्या संसदेचे अर्थसंकल्पिय अधिवेशन सुरू आहे. राष्ट्रपतींच्या अभिभाषणानंतर, धन्यवाद प्रस्तावाच्या चर्चेदरम्यान विरोधी पक्षनेते राहुल गांधी यांनी माजी लष्करप्रमुख मनोज नरवणे यांचा उल्लेख करत, डोकलाममध्ये चिनी टँकचा उल्लेख केला आणि लोकसभेत एकच गदारोळ सुरू झाला. दरम्यान संरक्षण मंत्री राजनाथ सिंह आणि गृहमंत्री अमित शाह यांनी राहुल गांधींच्या त्या विधानावर तीव्र आक्षेप घेतला. यानंतर, लोकसभा अध्यक्ष ओम बिर्ला यांनी नियम ३४९ चा हवाला देत राहुल गांधींना रोखले. 

लोकसभा अध्यक्ष ओम बिर्ला म्हणाले, "जे पुस्तकच प्रकाशितच झालेले नाही, त्याचा संदर्भ विरोधीपक्ष नेते सभागृहात देऊ शकत नाहीत." मात्र, यानंतरही राहुल गांधी वारंवार जनरल नरवणे यांच्या पुस्तकाचा उल्लेख करतच होते. दरम्यान गदारोळ एवढा वाढला की, राहुल गांधी म्हणाले, "मग आपणच सांगा, मी काय बोलायला हवे?" यावर अध्यक्ष म्हणाले, "मी काही आपला सल्लागार नाही. मूळ विषयावर बोलावे."

"भारत-चीन संबंधांवर बोलण्यापासून कोणता नियम रोखतो?" -दरम्यान, राहुल गांधी म्हणाले, "भारत-चीन संबंधांवर बोलण्यापासून आपल्याला कोणता नियम रोखतो?" यावर अध्यक्ष म्हणाले, सध्याच्या विषयाशी याचा काहीही संबंध नाही. मात्र, यावर राहुल गांधी पुन्हा म्हणाले, आपल्याला म्हणायचे आहे की, राष्ट्रपतींच्या अभिभाषणाचा परराष्ट्र धोरनाशी कसलाही संबंध नाही. यावर अध्यक्ष म्हणाले, आपण विषयावर बोलावे. यासंदर्भात आपल्याला अनेक वेळा नियम समजावण्यात आले आहेत.

अखिलेश यादव यांनी राहुल गांधींचे समर्थनार्थ केले -यानंतर, राहुल गांधी यांनी एका मासिकातील लेखाचा उल्लेख करत पुन्हा तोच विषय उपस्थित केला. यानंतर, सत्ताधारी बाकांवरून पुन्हा जोरदार विरोध करण्यात आला. दरम्यान, सपा प्रमुख अखिलेश यादव यांनी राहुल गांधींचे समर्थनार्थ केले. "चीनचा मुद्दा संवेदनशील असून एखादा सल्ला देशहिताचा असेल तर विरोधी पक्षनेत्यांना बोलू द्यायला हवे," असे ते म्हणाले. यावर, केंद्रीय संसदीय कामकाज मंत्री किरेन रिजिजू म्हणाले, "आम्ही येथे ऐकण्यासाठी बसलो आहोत. मात्र, ते अध्यक्षांच्या आदेशानंतरही पुन्हा तेच वाचत आहेत. सभागृह असे कसे चालू शकते?" यानंतरही सभागृहात बराचवेळ गदारोळ सुरू होता. अखेर सभापतींनी सभागृहाचे कामकाज दुपारी ३ वाजेपर्यंत तहकूब केले होते. यानंतर जेव्हा पुन्हा कामकाज सुरू झाले. त्यानंतरही राहुल गांधी त्यांच्या म्हणण्यावर आग्रही होते. यावर पुन्हा गदारोळ होऊन काम काज उद्यापर्यंत स्थगित करण्यात आले.