पाटणा - चित्रपटाला साजेल अशी घटना बिहारच्या जुमई जिल्ह्यात घडली आहे. सन 1999 मध्ये प्रदर्शित झालेल्या हम दिल दे चुके सनम या चित्रपटातील कथानकाप्रमाणेच घडलेल्या या प्रेमकहानीची सध्या जिल्ह्यात चर्चा आहे. आपल्या पत्नीचं लग्न तिच्या प्रियकरासोबत लावून देण्याचं धाडसी काम येथील तरुणाने केलंय. पतीसमोरच आपल्या प्रियकरासोबत पत्नी निघून जात असल्याचा हा व्हिडिओ सोशल मीडियावर व्हायरल झाला आहे.
बंगळुरू येथील युवकाशी संबंधित ही घटना असून 26 डिसेंबर रोजी पतीने आपल्या पत्नीचा विवाह तिच्या प्रियकराशी लावून दिला. जुमई जिल्ह्यातील वेगवेगळ्या गावातील हे तिघेजण रहिवाशी आहेत. खैरा येथील डांसिडीह गावाताली गुरु रविदास यांची मुलगी शिवानी कुमारीचे लग्न दोन वर्षांपूर्वी बल्थर गावातील विकास दास यांच्यासोबत झाले होते. दोघेही पती-पत्नी एकत्र राहात होते. विकास हा बंगळुरू येथील एका कंपनीत नोकरी करत होता. त्यामुळेच, लग्नानंतर आपल्या पत्नीला घेऊन विकास बंगळुरूला गेला.
विकासने पत्नीलाही आपल्या कंपनीत कामाला लावले, दरम्यान येथेच सचिन कुमार या युवकाशी शिवानीची ओळख झाली. त्यानंतर, गप्पागोष्टीतून मैत्री आणि मैत्रीनंतर दोघांमध्ये प्रेमही झाले. या दोघांमध्ये जवळीकता एवढी वाढली की शिवानीने सचिन कुमारसोबत राहण्याबाबत पतीला विचारणा केली. पत्नीची इच्छा आणि तिचे सचिनकुमारवरील प्रेम लक्षात घेऊन विकासने एक पाऊल पुढे टाकत निर्णय घेतला. स्वत: साक्षीदार बनून त्याने पत्नी शिवानीचे लग्न सचिन कुमारसोबत लावून दिले. या लग्नाची पंचक्रोशीत चर्चा रंगली असून यासंदर्भात नातेवाईकांनी काहीही प्रतिक्रिया दिली नाही. दरम्यान, हम दिल दे चुके सनम चित्रपटातील अजय देवगणच्या भूमिकेत विकास तर सलमान खानच्या भूमिकेत सचिन कुमार दिसून आला असून ऐश्वर्या रायची जागा शिवानीने घेतली आहे. त्यामुळे, फिल्मी स्टाईल सत्यकथेची जोरदार चर्चा होत आहे.