पंचकुला, दि. 15 - डेरा सच्चा सौदाचा प्रमुख गुरमीत राम रहीम याच्याविरोधात आणखी दोन हत्येप्रकरणी उद्या न्यायालयात सुनावणी होणार आहे. यादरम्यान, हरयाणामधील पंचकुला येथे कोणताही अनुचित प्रकार घडू नये, यासाठी मोठा पोलीस बंदोबस्त वाढविण्यात आला आहे. गेल्या 25 ऑगस्ट रोजी गुरमीत राम रहीम याला दोन साध्वींवर बलात्कार केल्याप्रकरणी सीबीआयच्या न्यायालयाने दोषी ठरविल्यानंतर त्याला कारावासाची शिक्षा सुनावली आहे. सिरसा येथील पत्रकार रामचंद्र छत्रपती आणि डेरा सच्चा सौदाचा माजी व्यवस्थापक रणजीत सिंह यांची हत्या केल्याचा आरोप गुरमीत राम रहिम याच्यावर आहे. विशेष म्हणजे, या हत्येच्या खटल्याची सुनावणी सुद्धा सीबीआयच्याच न्यायालयात उद्या (दि. 16) होणार आहे. पंचकुला येथील सेक्टर एकमधील न्यायालयाच्या आवारात आणि आजूबाजूच्या परिसरात कायदा आणि सुव्यवस्था बिघडू नये यासाठी निमलष्करी दल आणि पोलीस तैनात करण्यात आल्याची माहिती, हरयाणाचे पोलीस महासंचालक बीएस संधू यांनी दिली आहे. दरम्यान, गुरुमीत राम रहीम याच्यावरील बलात्कार प्रकारणाची सुनावणी करतेवेळी पंचकुला परिसरात त्याच्या एक लाखहून अधिक समर्थकांनी धुडगूस घातला होता. तसेच, त्यांनी माध्यमांच्या ओबी व्हॅन्ससह इतर वाहनांची जाळपोळ केली होती. मात्र, आता या परिसरात एकही समर्थक याठिकाणी आला नसल्याची माहिती सुद्धा पोलीस महासंचालक बीएस संधू यांनी दिली. याचबरोबर, गुरमीत राम रहिम याला उद्या हत्येप्रकरणाची सुनावणी करण्यासाठी त्याला सीबीआयच्या कोर्टात हजर करण्याची शक्यता कमी आहे. ही सुनावणी व्हिडिओ कॉन्फरन्सिंगद्वारे जेलमध्येच होणार असल्याचे पोलिसांनी सांगितले. सीबीआय न्यायालयाने गुरमीत राम रहीम याला दोन साध्वींवर बलात्कार केल्याप्रकरणी दोषी ठरविल्यानंतर पंचकुलामध्ये हिंसाचार उसळला होता. या हिंसाचारात 38 जण ठार झाले. तर 200 हून अधिक लोक जखमी झाले आहे. दरम्यान, गुरमीत राम रहीमला बलात्काराच्या दोन्ही प्रकरणांमध्ये न्यायालयाने 20 वर्षांच्या कारावासाची शिक्षा सुनावली आहे. पत्रकार रामचंद्र छत्रपती आणि डेरा सच्चा सौदाचा माजी व्यवस्थापक रणजीत सिंह यांची हत्या 2002 मध्ये झाली होती.
हत्येप्रकरणी गुरमीत राम रहीमचा उद्या फैसला, परिसरात कडेकोट पोलीस बंदोबस्त
By ऑनलाइन लोकमत | Published: September 15, 2017 5:47 PM