पालिकेला मिळेना महिला सुरक्षारक्षक नकारघंटा : अर्भक चोरी रोखण्यासाठी ७७ रक्षकांची आवश्यकता

न�

��शिक : महापालिकेचे दवाखाने, प्रसूतिगृह आणि नवजात शिशुवार्डांमध्ये अर्भक चोरी होण्याच्या घटनांना पायबंद घालण्यासाठी व अर्भकांच्या सुरक्षिततेकरिता ७७ महिला सुरक्षारक्षकांची आवश्यकता आहे. सदर महिला सुरक्षारक्षकांची मागणी महापालिकेने सुरक्षा मंडळ, होमगार्ड विभाग आणि नाशिक जिल्हा सैनिकी मंडळाकडे करूनही नकारघंटाच कानावर आल्याने पालिका प्रशासनाने अखेर ई-निविदा पद्धतीने महिला सुरक्षारक्षकांची भरती करण्याचा निर्णय घेतला आहे. तसा प्रस्ताव शुक्रवारी (दि.१७) होणार्‍या महासभेत ठेवला जाणार आहे.
राज्यात यापूर्वी ठिकठिकाणी अर्भक चोरीच्या घटना घडल्याने उच्च न्यायालयाने प्रतिबंधात्मक उपाययोजना म्हणून महिला सुरक्षारक्षकांच्या नेमणुका करण्याचे आदेश दिले आहेत. सुरक्षारक्षकांच्या नेमणुका या सुरक्षारक्षक मंडळामार्फतच करण्याचे शासनाचे धोरण आहे. त्यानुसार महापालिकेचे दवाखाने, प्रसूतिगृह तसेच नवजात शिशुवार्डांमध्ये महिला सुरक्षारक्षक नेमण्यासाठी सुरक्षा मंडळाकडे ७७ महिला रक्षकांची मागणी नोंदविलेली होती. परंतु सुरक्षारक्षक मंडळाने सद्यस्थितीत महिला सुरक्षारक्षकच उपलब्ध नसल्याचे महापालिकेला कळविले आहे. महापालिकेने होमगार्ड विभागाकडेही महिला सुरक्षारक्षकांची मागणी नोंदवून पाहिली; परंतु होमगार्ड विभागानेही महिला होमगार्ड पुरविण्याबाबत असमर्थता दर्शविली. महापालिकेने पर्याय म्हणून नाशिक जिल्हा सैनिकी बोर्डालाही साकडे घालून पाहिले; परंतु त्यांच्याकडूनही नकारघंटाच ऐकायला मिळाली. महापालिकेचे नाशिकरोड येथील बिटको रुग्णालयात २४, जुन्या नाशकातील डॉ. झाकीर हुसेन रुग्णालयात १४, पंचवटीतील इंदिरा गांधी रुग्णालयात १४, गंगापूर आणि सिन्नर फाटा, तसेच जिजामाता प्रसूतिगृह, पंचवटीतील मायको दवाखाना, सातपूर येथील मायको प्रसूतिगृह, दसक-पंचक येथील प्रसूतिगृह व उपनगर प्रसूतिगृह याठिकाणी प्रत्येकी ३, मोरवाडीतील श्री स्वामी समर्थ रुग्णालयात ४ याप्रमाणे एकूण ७७ महिला सुरक्षारक्षकांची गरज भासणार आहे. सर्वत्र नकारघंटाच ऐकायला मिळाल्याने महापालिकेने अखेर ई-निविदा पद्धतीने महिला सुरक्षारक्षकांच्या नेमणुका करण्याचा निर्णय घेतला आहे. सदर नेमणुका या तीन वर्षांच्या कालावधीकरिता राहणार असून, त्यासाठी महापालिकेला सुमारे सव्वा चार कोटी रुपये मोजावे लागणार आहेत.
इन्फो
६६ पुरुष सुरक्षारक्षकांच्या होणार नेमणुका
महापालिकेचे दवाखाने व प्रसूतिगृहांसाठी महिला सुरक्षारक्षकांबरोबरच ६३ पुरुष सुरक्षारक्षकांच्याही नेमणुका केल्या जाणार आहेत. पुरुष सुरक्षारक्षक हे महाराष्ट्र शासनाशी संबंधित सुरक्षा मंडळाकडे उपलब्ध असल्याने त्यांच्यामार्फतच नियुक्त केले जाणार आहेत. त्यासाठी महापालिकेला तीन वर्षांकरिता ३ कोटी २१ लाख रुपये मोजावे लागणार आहेत.