देशात गॅस टंचाई, गोरपूरमध्ये सिलेंडरसाठी ग्राहकांमध्ये हाणामारी, एकमेकांना लाथा बुक्क्यांनी मारले

Uttar Pradesh Crime News: अमेरिका आणि इस्राइलने इराणविरोधात पुकारलेल्या युद्धामुळे आखाती देशांमध्ये तणावपूर्ण परिस्थिती निर्माण झाली आहे. त्यामुळे जगभरात मोठ्या प्रमाणावर तेलटंचाई आणि गॅसची टंचाई जाणवू लागली आहे. भारतातही टंचाईचं हे संकट गंभीर रूप धारण करत आहे. तसेच देशभरात गॅस सिलेंडरच्या टंचाईमुळे गोंधळाची स्थिती आहे.

अमेरिका आणि इस्राइलने इराणविरोधात पुकारलेल्या युद्धामुळे आखाती देशांमध्ये तणावपूर्ण परिस्थिती निर्माण झाली आहे. त्यामुळे जगभरात मोठ्या प्रमाणावर तेलटंचाई आणि गॅसची टंचाई जाणवू लागली आहे. भारतातही टंचाईचं हे संकट गंभीर रूप धारण करत आहे. तसेच देशभरात गॅस सिलेंडरच्या टंचाईमुळे गोंधळाची स्थिती आहे. अनेक ठिकाणी गॅस सिलेंडर मिळत नसल्याच्या तक्रारी समोर येत आहेत. गॅस एजन्सींसमोर ग्राहकांच्या रांगा लागलेल्या दिसत आहेत. तसेच सिलेंडरवरून ग्राहकांमध्ये वादावादीही होताना दिसत आहे. दरम्यान, आज गोरखपूर येथील पीपीगंज पोलीस ठाण्याच्या हद्दीत असलेल्या आशिष इंडेन गॅस एजन्सीमध्ये आज सकाळी गॅस सिलेंडर घेण्यासाठी आलेल्या ग्राहकांमध्ये हमरीतुमरी झाली.

याबाबत मिळालेल्या अधिक माहितीनुसार सकाळी ९.३० च्या सुमारास रांगेमध्ये जबरदस्तीने घुसण्याच्या प्रयत्नावरून दोन गटातील तरुणांमध्ये वाद झाला आणि प्रकरण हाणामारीपर्यंत पोहोचले. ही घटना घडली तेव्हा पोलीसही तिथे उपस्थित होते. पोलिसांनी तत्काळ हस्तक्षेप करत हाणामारी करणाऱ्यांना ताब्यात घेतले आणि सक्त ताकीद देऊन सोडून दिले.

पुरवठ्यामध्ये कपात झाल्याने सध्या गॅस एजन्सींसमोर ग्राहकांची मोठ्या प्रमाणावर गर्दी होऊ लागली आहे. पीपीगंजमध्ये गॅस सिलेंडरसाठी पहाटेपासूनच मोठमोठ्या रांगा लागत आहे. दरम्यान, काही लोकांनी रांग तोडून मध्ये घुसण्याचा प्रयत्न केल्याने वादाला तोंड फुटलं. त्यातून वाद एवढा वाढला की एका तरुणाला जमिनीवर पाडून मारहाण करण्यात आली. त्यानंतर तिथे कर्तव्यावर असलेल्या पोलिसांनी बळाचा वापर करत मारहाण करणाऱ्यांना तिथून बाजूला केले. तसेच घटनास्थळी कडेकोट बंदोबस्त तैनात करण्यात आला आहे.