राजकोटमधील साधू वासवानी रोडवरील ‘मोमोनी रेस्टॉरंट’मध्ये एक विचित्र आणि धक्कादायक प्रकार समोर आला आहे. या हॉटेलमध्ये जेवायला आलेल्या तीन तरुणांनी मोफत जेवण मिळवण्यासाठी अशी एक योजना आखली की, ती पाहून सगळ्यांनाच चीड आली. खाल्लेल्या जेवणाचे पैसे द्यावे लागू नयेत म्हणून त्यांनी अतिशय किळसवाणा कांगावा केला. स्वतःच्याच डोक्यावरचे केस उपटून त्यांनी ते अन्नात टाकले. यानंतर त्यांनी हॉटेलवरच अन्नात केस आढळल्याचा आरोप करत गोंधळ घालण्यास सुरुवात केली.
हॉटेलमध्ये घातला गोंधळ
सदर प्रकार सीसीटीव्ही कॅमेऱ्यात कैद झाल्याने या तरुणांचा खोटेपणा लगेचच उघडकीस आला. फुटेजमध्ये स्पष्टपणे दिसले की, दोघांनी मुद्दाम स्वतःचे केस उपटून ते अन्नात टाकले आणि नंतर हॉटेल मॅनेजरवर ओरडायला सुरुवात केली. त्यांनी हॉटेलमधील स्वच्छतेबद्दल तक्रार करत कर्मचाऱ्यांवर आरोप केले आणि बिल भरण्यास देखील नकार दिला.
माफी मागावी लागली अन्...
या भांडणादरम्यान हॉटेलच्या स्टाफने या तरुणांना समजावण्याचा प्रयत्न केला. मात्र, त्यांच्यातील एका तरुणाने या केसांची डीएनए चाचणी करण्याची मागणी केली. या तरुणांना हॉटेलमधून फुकट जेवण हवे होते, त्यासाठी त्यांचा हा आटापिटा सुरू होता. या प्रकरणात हॉटेल कर्मचाऱ्यांनी सुरुवातीला थोडा गोंधळ सहन केला, पण नंतर सीसीटीव्ही फुटेज तपासल्यावर सत्य बाहेर आले. शेवटी, या तीनही तरुणांना त्यांच्या खोट्या वागणुकीसाठी माफी मागावी लागली.