यादव कुटुंबात भूकंप! स्वार्थी महिलेने माझे... प्रतीक यादव देणार अपर्णा यादव यांना घटस्फोट; इन्स्टाग्राम पोस्टने खळबळ

Prateek Yadav Aparna Yadav Divorce: अपर्णा यादव सध्या उत्तर प्रदेश राज्य महिला आयोगाच्या उपाध्यक्ष आहेत. त्या भाजपच्या सक्रिय नेत्या असून मुलायमसिंह यांच्या निधनापूर्वीच त्यांनी भाजपमध्ये प्रवेश केला होता.

लखनौ: उत्तर प्रदेशातील सर्वात प्रभावशाली राजकीय कुटुंब असलेल्या यादव कुटुंबातून एक धक्कादायक बातमी समोर येत आहे. समाजवादी पक्षाचे संस्थापक दिवंगत मुलायमसिंह यादव यांचे धाकटे चिरंजीव प्रतीक यादव यांनी त्यांची पत्नी आणि भाजप नेत्या अपर्णा यादव यांना घटस्फोट देण्याची घोषणा केली आहे. प्रतीक यादव यांनी त्यांच्या अधिकृत इन्स्टाग्राम अकाऊंटवर एक अत्यंत भावूक आणि संतापजनक पोस्ट शेअर करत ही माहिती दिली आहे.

"स्वार्थी महिलेने माझे आयुष्य उद्ध्वस्त केले" प्रतीक यादव यांनी आपल्या इन्स्टाग्राम पोस्टमध्ये अपर्णा यादव यांच्यावर गंभीर आरोप केले आहेत. त्यांनी लिहिले की, "मी या स्वार्थी महिलेला लवकरात लवकर घटस्फोट देणार आहे. तिने माझ्या कुटुंबातील नातेसंबंध खराब केले आहेत. तिला फक्त प्रसिद्धी आणि सत्तेची हाव आहे. सध्या माझी मानसिक स्थिती अत्यंत खराब आहे, पण तिला त्याचे काहीच पडलेले नाही."

प्रतीक यांनी पुढे म्हटले की, "मी इतकी वाईट प्रवृत्ती असलेली स्त्री कधीच पाहिली नाही. माझ्या आयुष्यातील सर्वात मोठे दुर्दैव म्हणजे मी तिच्याशी लग्न केले." ही पोस्ट सोशल मीडियावर वाऱ्यासारखी पसरली असून राजकीय वर्तुळात उलटसुलट चर्चांना उधाण आले आहे.

अपर्णा यादव यांची भूमिका काय?अपर्णा यादव सध्या उत्तर प्रदेश राज्य महिला आयोगाच्या उपाध्यक्ष आहेत. त्या भाजपच्या सक्रिय नेत्या असून मुलायमसिंह यांच्या निधनापूर्वीच त्यांनी भाजपमध्ये प्रवेश केला होता. प्रतीक यांच्या या खळबळजनक पोस्टनंतर अद्याप अपर्णा यादव यांनी कोणतीही अधिकृत प्रतिक्रिया दिलेली नाही. तसेच यादव कुटुंबातील इतर सदस्यांनीही या विषयावर मौन पाळले आहे.

प्रतीक आणि अपर्णा यांचे २०११ मध्ये लग्न झाले होते. अनेक वर्षे सुखी संसार केल्यानंतर अचानक अशा पद्धतीने घटस्फोटाची चर्चा समोर आल्याने सर्वांनाच आश्चर्याचा धक्का बसला आहे.