नवी दिल्ली - यंदाच्या लोकसभा निवडणुकीत राष्ट्रीय सुरक्षा हा मोठा मुद्दा ठरला आहे. एकीकडे पंतप्रधान नरेंद्र मोदी आणि भाजपाकडूनसर्जिकल स्ट्राइक आणि एअर स्ट्राइकचा वारंवार उल्लेख केला जात आहे. तर सैन्य दलांच्या पराक्रमावरून सुरू असलेल्या राजकारणावरून विरोधक मोदी आणि भाजपावर टीका करत आहेत. दरम्यान, आमच्याही काळात सर्जिकल झाल्या होत्या, असा दावा काँग्रेसने केला आहे. तसेच आपल्या सरकारच्या काळात झालेल्या सर्जिकल स्ट्राइकची यादीच काँग्रेसकडून प्रसिद्ध करण्यात आली आहे. माजी पंतप्रधान डॉ. मनमोहन सिंग यांनी काल दिलेल्या एका मुलाखतीत अनेक प्रश्नांवर भाष्य करताना सर्जिकल स्ट्राइकचाही उल्लेख केला होता. ''आमच्या सरकारच्या कार्यकाळात अनेकदा सर्जिकल स्ट्राइक झाल्या. या कारवाया संरक्षण आणि देशविरोधी शक्तींना प्रत्युत्तर देण्यासाठी करण्यात आल्या होत्या. निवडणुकीत मत मिळवण्यासाठी करण्यात आल्या नव्हत्या,'' असा टोला मनमोहन सिंग यांनी या मुलाखतीतून भाजपा आणि पंतप्रधान नरेंद्र मोदींना लगावला होता. त्यानंतर आज काँग्रेसकडून आपल्या सरकारच्या काळात झालेल्या सर्जिकल स्ट्राइकची यादी प्रसिद्ध करण्यात आली.
आमच्याही काळात झाले होते सर्जिकल स्ट्राइक, काँग्रेसचा दावा
By ऑनलाइन लोकमत | Updated: May 2, 2019 15:52 IST