एअर इंडियाच्या सर्व बोईंग ७८७ विमानांची होणार तपासणी; डीजीसीएने घेतला मोठा निर्णय

अहमदाबाद विमान अपघातानंतर, डीजीसीएने एअर इंडियाला त्यांच्या बोईंग विमानांची अतिरिक्त तपासणी आणि देखभाल करण्याचे निर्देश दिले.

Ahmedabad Plane Crash: गुजरातमधील अहमदाबाद येथे झालेल्या भीषण विमान अपघातानंतर नागरी विमान वाहतूक संचालनालयाने  बोईंग ७८७-८/९ विमानांवरील सुरक्षा तपासणी वाढवण्याच्या सूचना जारी केल्या आहेत. ही नवीन सूचना १५ जून २०२५ रोजी मध्यरात्री १२ वाजल्यापासून लागू होणार आहे. उड्डाणापूर्वी डीजीसीएने अनेक महत्त्वाच्या तांत्रिक तपासणी करण्याचे निर्देश दिले आहेत. अहमदाबादमध्ये विमान कोसळून झालेल्या अपघातात आतापापर्यंत २७४ लोकांचा मृत्यू झाला. यापैकी २४१ हे विमानातील प्रवासी होती. भविष्यातील अपघात टाळण्यासाठी डीजीसीएने हा महत्त्वाचा निर्णय घेतला आहे.

अहमदाबादहून लंडनला जाणाऱ्या एअर इंडियाच्या विमानाच्या अपघातानंतर डीजीसीएने पावलं उचलण्यास सुरुवात केली आहे. डीजीसीएने एअर इंडियाच्या सर्व बोईंग ७८७ ड्रीमलाइनर विमानांच्या ताफ्याची कडक तपासणी करण्याचे आदेश दिले आहेत. एअर इंडियाला लिहिलेल्या पत्रात, डीजीसीएने १५ जून २०२५ पासून विमान कंपनीला त्यांच्या सर्व बोईंग ७८७-८/९ विमानांच्या ताफ्यात कराव्या लागणाऱ्या तपासण्यांची यादी दिली.

एअर इंडियाच्या ७८७-८ आणि ७८७-९ ड्रीमलायनर विमानांच्या इंधन देखरेख, इंजिन नियंत्रण प्रणाली, हायड्रॉलिक प्रणाली, टेक-ऑफ पॅरामीटर्स आणि उड्डाण नियंत्रणांसाठी कसून तपासणी करावी लागणार आहे, असं डीजीसीएने म्हटले. ही विमाने जीई एरोस्पेसद्वारे उत्पादित जीएनएक्स इंजिनने सुसज्ज आहेत. एअर इंडियाकडे एकूण ३३ ड्रीमलायनर विमाने आहेत. त्यामध्ये २६ बोईंग ७८७-८ आणि ७ बोईंग ७८७-९ आहेत. या सर्व विमानांची अतिरिक्त तपासणी डीजीसीएच्या प्रादेशिक कार्यालयांच्या देखरेखीखाली केली जाईल.

केबिन एअर कॉम्प्रेसर, संबंधित प्रणाली, इलेक्ट्रॉनिक इंजिन नियंत्रण प्रणाली, इंजिन इंधन चालविणारे अ‍ॅक्च्युएटर्स, ऑईल सिस्टिट आणि हायड्रॉलिक प्रणालीची सेवाक्षमता आणि टेक-ऑफ पॅरामीटर्सची ऑपरेशनल चाचणी केली जाईल. हायड्रॉलिक सिस्टीम, इंजिन ऑइल सिस्टीम आणि फ्युएल अ‍ॅक्च्युएटरचे काम तपासले पाहिजे. पॉवर अ‍ॅश्युरन्स टेस्ट दोन आठवड्यांच्या आत पूर्ण करण्यात सांगितले आहेत. तसेच गेल्या १५ दिवसांत वारंवार नोंदवलेल्या समस्यांचा आढावा आणि त्याच्यावरील केलेल्या कामाचा अहवाल सादर करण्याच्या सूचना देण्यात आल्या आहेत.