नवी दिल्ली - दिल्लीतील जहांगीरपुरी परिसरात हनुमान जयंतीनिमित्त झालेल्या हिंसाचाराची (Delhi Jahangirpuri Violence) सध्या सर्वत्र चर्चा आहे. या प्रकरणी आतापर्यंत 22 जणांना अटक करण्यात आली असून, त्यावरून राजकारणही सुरू झालं आहे. याच दरम्यान केंद्रीय गृहमंत्री अमित शाह (Amit Shah) यांनी दिल्ली हिंसाचारावर मोठं विधान केलं आहे. अमित शाह यांनी दिल्ली पोलीस अधिकाऱ्यांना कडक सूचना दिल्या आहेत की, दंगलखोरांवर अशी कडक कारवाई करा की दिल्लीत पुन्हा अशी दंगल आणि हिंसाचार घडू नये.
दिल्लीत अशी घटना पुन्हा घडू नये यासाठी आवश्यक ती पावले उचलावीत, अशा कडक सूचना देखील अमित शाह यांनी दिल्ली पोलीस आयुक्तांना दिल्या आहेत. त्याचबरोबर या प्रकरणाचा तपास जलदगतीने करण्याचे आदेशही देण्यात आले आहेत. दिल्लीतील हिंसाचारानंतर लगेचच अमित शाह यांनी दिल्ली पोलीस आयुक्तांशी फोनवर चर्चा केली आणि योग्य ती पावले उचलण्याच्या सूचना दिल्या आहेत. दिल्लीत झालेल्या हिंसाचारावरून देशभरात राजकरण तापलं आहे. या घटनेबाबत केंद्रातील सरकार आणि पंतप्रधान मोदी यांच्या मौनावर विरोधी पक्ष सवाल करत आहेत.
भाजपकडून याला उत्तर दिले जात आहे. दिल्लीतील पोलीस, कायदा आणि सुव्यवस्था केंद्रीय गृहमंत्रालयाच्या अखत्यारीत येते, त्यामुळेच केंद्र विरोधकांच्या निशाण्यावर आहे. मात्र याला उत्तर देण्यासाठी भाजपाचे राष्ट्रीय अध्यक्ष जेपी नड्डा यांच्या वतीने एक पत्र जारी करण्यात आले असून त्यात काँग्रेसच्या काळात झालेल्या दंगलींचा उल्लेख करण्यात आला आहे. यानंतर भाजपच्या प्रवक्त्यांनी पत्रकार परिषद घेऊन काँग्रेसवर जोरदार हल्लाबोल केला. राजस्थानमधील करौली येथील हिंसाचारावर भाजपा नेते गौरव भाटिया यांनी काँग्रेसकडे उत्तर मागितले आहे.
हिंसाचार प्रकरणी दिल्ली पोलीस आता अटक करत आहेत. सीसीटीव्ही फुटेज आणि इतर माध्यमातून लोकांची ओळख पटवली जात असून, या हिंसाचारात सहभागी असलेल्यांना तातडीने अटक केली जात आहे. गोळीबार करणाऱ्या आरोपीला पोलिसांनी आधीच अटक केली होती, त्याला न्यायालयात हजर करण्यात आले. आरोपींकडून हिंसाचाराबद्दल चौकशी केली जात आहे. दिल्लीचे पोलीस आयुक्त राकेश अस्थाना यांनी या घटनेबाबत सांगितले की, दुपारी 4.15 वाजता हनुमान जयंतीनिमित्त मिरवणूक काढण्यात आली. यानंतर काही लोकांमध्ये वाद झाल्यावर दगडफेक सुरू झाली. एका हिंदी वेबसाईटने याबाबतचे वृत्त दिले आहे.