दलबीरसिंह सुहाग नवे लष्करप्रमुख

नवी दिल्ली, दि. १३ - निवडणूक आयोगाने हिरवा कंदील दाखवल्यावर संरक्षण मंत्रालयाने मंगळवारी लेफ्टनंट जनरल दलबीरसिंह सुहाग यांची लष्करप्रमुखपदी नियुक्ती केली. विद्यमान लष्करप्रमुख विक्रमसिंह हे ३१ जुलैला निवृत्त झाल्यावर सुहाग कार्यभार स्वीकारतील. 

भारतात विद्यमान लष्करप्रमुख निवृत्त होण्याच्या दोन महिन्यांपूर्वी नव्या लष्करप्रमुखाच्या नावाची घोषणा केली जाते. लोकसभा निवडणूकीसाठी रणसंग्राम सुरु असताना संरक्षण मंत्रालयाने नवीन लष्करप्रमुखाची शिफारसही केली होती. मात्र भाजपने यावर आक्षेप घेत निवडणूक आयोगाकडे धाव घेतली होती. नव्या लष्करप्रमुखाची नेमणूक नव्या सरकारवर सोडावी असे भाजपचे म्हणणे होते. मात्र निवडणूक आयोगाने यामध्ये हस्तक्षेप करण्यास नकार दिल्याने नव्या लष्करप्रमुखाच्या नियुक्तीचा मार्ग मोकळा झाला. यानंतर मंगळवारी संरक्षण मंत्रालयाने लष्कर उपप्रमुख दलबीरसिंह सुहाग यांची लष्करप्रमुखपदी नियुक्ती जाहीर केली. 

१९७४ मध्ये सैन्याच्या गोरखा रायफल्समध्ये सुहाग दाखल झाले. पूर्वोत्तर भारत व जम्मू - काश्मीर या भागांमध्ये काम करण्याचा त्यांना प्रदीर्घ अनुभव आहे. मे २०१२ मध्ये तत्कालीन लष्करप्रमुख व सध्या भाजपात सक्रीय असलेले व्ही. के. सिंह यांनी सुहाग यांच्यावर निर्बंध घातले होते. आसाममधील एक कारवाई रोखण्यात अपयशी ठरल्याने सुहाग यांच्यावर हे निर्बंध घालण्यात आले होते. मात्र सिंह यांच्यानंतर पदभार स्वीकारणारे विक्रमसिंह यांनी सुहाग यांच्यावरील निर्बंध मागे घेतले. तसेच त्यांना पूर्व विभागाच्या कमांडरपदीही नेमले. ५९ वषीय सुहाग हे सेवाज्येष्ठतेनुसार सर्वात वरिष्ठ अधिकारी असल्याने त्यांची लष्करप्रमुखपदावर नियुक्ती करण्यात आली.