चेन्नई: तामिळ अभिनेता कमल हासनचा आगामी चित्रपट इंडियन 2 च्या सेटवर बुधवारी रात्रीच्या सुमारास भीषण अपघात झाला. यामध्ये तिघेजण जागीच ठार झाले असून 9 जण गंंभीर जखमी आहेत. अपघातावेळीकमल हासन सेटवर हजर होता.
चेन्नईतील ईव्हीपी फिल्मसिटीमध्ये इंडियन 2 चे चित्रीकरण सुरु आहे. यावेळी सेटअप तयार करत असताना क्रेन सेटवर कोसळली. यामध्ये तीन जण जागीच ठार झाले तर 9 जण जखमी झाले आहेत. हसन यांना कोणतीही इजा पोहोचलेली नसून डायरेक्टर शंकर जखमी झाल्याचे बोलले जात आहे.
घटनास्थळी पोलिसांनी मदत सुरू केली. तसेच अपघातात तीन जण ठार झाल्याचे सांगितले.
या घटनेची कमल हासननेही पुष्टी केली असून त्याने दुःख व्यक्त केले आहे. आज झालेला अपघात हा माझ्या करियरमधील कधी न पाहिलेला भीषण अपघात होता. मी माझे तीन सहकारी गमावले. पण त्याहून मोठे दुःख त्यांच्या नातेवाईकांचे वाटते. असे ट्विट हसन यांनी केले आहे.
क्रेनमधून मोठ्या वजनाच्या वस्तू हलविण्यात येत होत्या. यावेळी या वस्तू तुटून खाली कोसळल्या. या वस्तुखाली दबून तिघांचा मृत्यू झाला. रात्री 9.30 च्या सुमारास हा अपघात झाल्याचे समजते.