Coronavirus: देशातील अनेक राज्यात कोरोना रुग्णसंख्येत वाढ; महाराष्ट्रात ८६ नवीन रुग्ण आढळले

गुजरातमध्येही १८३ कोरोना रुग्ण समोर आलेत. तिथे सक्रिय रुग्णांच्या संख्येत वाढ होऊन ८२२ इतकी संख्या पोहचली आहे.

नवी दिल्ली - देशात पुन्हा एकदा कोरोना संसर्ग वाढत चालला आहे. अनेक राज्यातील सक्रिय रुग्णांची संख्येत वाढ होत आहे. आरोग्य विभागाच्या ताज्या आकडेवारीनुसार, हरियाणा, गुजरात, महाराष्ट्र, उत्तराखंड आणि पश्चिम बंगालसह इतर राज्यात नवीन कोविड रुग्ण समोर आले आहेत. त्यात हरियाणात आता १०२ सक्रिय कोरोना रुग्ण आहेत. एक दिवसापूर्वी हा आकडा ८७ इतका होता. गुरुग्राम जिल्ह्यात सर्वाधिक रुग्ण आढळले आहेत. 

महाराष्ट्रात किती?

महाराष्ट्रात आज कोरोनाचे ८६ रुग्ण आढळले आहेत. सध्या राज्यात ५९५ सक्रिय कोविड रुग्ण आहेत तर ७४९ कोरोना रुग्ण उपचारानंतर पूर्णपणे बरे झाले आहेत. गुजरातमध्येही १८३ कोरोना रुग्ण समोर आलेत. तिथे सक्रिय रुग्णांच्या संख्येत वाढ होऊन ८२२ इतकी संख्या पोहचली आहे. त्यातील ७९३ रुग्ण होम आयसोलेशनमध्ये आहेत तर २९ रुग्णांवर रुग्णालयात उपचार करण्यात येत आहे. दिलासादायक म्हणजे ७८ रुग्ण बरे झाले आहेत. 

तर उत्तराखंड येथे ३ नवे कोरोना रुग्ण सापडलेत. राज्यात सध्या सक्रिय रुग्णांची संख्या ९ इतकी आहे. १७ रुग्ण उपचारानंतर घरी परतले आहेत. एकूण कोरोना रुग्णांची संख्या २७ इतकी असून ज्यात ७ प्रवासी रुग्ण होते जे पूर्णपणे बरे झालेत. पश्चिम बंगालमध्ये सध्या ६२२ सक्रिय कोरोना रुग्ण आहेत. गेल्या २४ तासांत २६ कोरोना रुग्ण आढळले आहेत. ८८ रुग्ण बरे होऊन घरी परतलेत. राज्यात आतापर्यंत कोरोनामुळे एकही मृत्यू नाही. 

दरम्यान, कोरोनाचा हा ओमिक्रॉन व्हेरिएंट आहे. जो वेगाने पसरत असला तरी गंभीर आजार होत नाही. त्यामुळे लोकांनी घाबरण्याचे कारण नाही. मास्क घालणे, ५ दिवस आयसोलेशनमध्ये राहणे आणि इतर काळजी घेणे असं आवाहन डॉ. सायन मिश्रा यांनी केले. कर्नाटकात शनिवारी कोविडमुळे २ रुग्णांचा मृत्यू झाला आहे. ज्यामुळे राज्यात यावर्षी कोरोनामुळे मृतांची संख्या ९ झाली आहे. बंगळुरूतील ४६ वर्षीय आणि बेळगावातील ७८ वर्षीय व्यक्ती ज्यांना श्वसनाच्या त्रासामुळे रुग्णालयात दाखल केले होते. या दोघांना कोरोनाची लागण झाली होती. शनिवारी राज्यात ५७ नवे कोरोना रुग्ण आढळले आहेत. त्यामुळे २०२५ या वर्षी आतापर्यंत एकूण संक्रमित संख्या ८९४ इतकी झाली आहे.