नवी दिल्ली - वाढत्या महागाईविरोधात विरोधक सातत्याने केंद्र सरकारवर हल्लाबोल करत आहेत. पेट्रोल आणि डिझेलच्या किमतींमध्ये सातत्याने वाढ होत आहे. सद्य:स्थितीत देशातील सर्व राज्यांमध्ये पेट्रोलने शंभरी गाठली असून, प्रमुख शहरांमध्ये डिझेलचा दरही 100 रुपये प्रतिलीटरपेक्षा जास्त झाला आहे. त्यातही काही शहरांमध्ये पेट्रोलची 110 रुपये अधिक दराने विक्री होत आहे. काँग्रेस नेते राहुल गांधी (Congress Rahul Gandhi) यांनी बुधवारी मोदी सरकारवर जोरदार निशाणा साधला आहे. दिवाळीच्या काळात महागाई शिगेला पोहोचली आहे म्हणत टीकास्त्र सोडलं आहे.
राहुल गांधी यांनी आपल्या ट्विटर अकाऊंटवरून याबाबत ट्विट केलं आहे. मोदी सरकारकडे जनतेसाठी संवेदनशील हृदय असावं अशी इच्छा देखील व्यक्त केली आहे. "आज दिवाळी आहे. महागाई शिगेला पोहोचली आहे. हा विनोद नाही. मोदी सरकारकडे जनतेसाठी संवेदनशील हृदय असावं अशी इच्छा आहे" असं राहुल गांधी यांनी आपल्या ट्विटमध्ये म्हटलं आहे. इंधन दरवाढीवरून विरोधक केंद्र सरकार जोरदार हल्लाबोल करत आहेत. याच दरम्यान राजस्थानचे मुख्यमंत्री अशोक गेहलोत (Ashok Gehlot) यांनी मोदी सरकारवर (Modi Government) जोरदार हल्लाबोल केला आहे. "मोदी सरकारने जनतेला दिवाळी भेट म्हणून ही महागाई दिली आहे" असं म्हणत निशाणा साधला आहे.
"मोदी सरकारने जनतेला दिवाळी भेट म्हणून दिली महागाई"; इंधन दरवाढीवरून जोरदार हल्लाबोल
"देशाच्या स्वातंत्र्याचा अमृत महोत्सव हा पेट्रोल, डिझेल आणि एलपीजीच्या किमतीत विक्रमी वाढ केल्याबद्दल कायम स्मरणात राहील. नरेंद्र मोदी सरकारने जनतेला दिवाळी भेट म्हणून महागाई दिल्याचे दिसते" असं अशोक गेहलोत यांनी म्हटलं आहे. तसेच "पेट्रोल, डिझेल, एलपीजी, खाद्यतेल आणि भाज्यांच्या किमती ज्या प्रकारे वाढत आहेत, ते पाहता मोदी सरकारने जनतेला महागाईची दिवाळी भेट दिली आहे. आधीची सरकारे सणांच्या आधी महागाई कमी करण्याचा प्रयत्न करत असत, जेणेकरून सर्वसामान्यांना सण आनंदाने साजरा करता यावा" असं देखील त्यांनी म्हटलं आहे.
अशोक गेहलोत यांनी आपल्या ट्विटर अकाऊंटवरून याबाबत एक ट्विट केलं आहे. "दिवाळीच्या फक्त तीन दिवस आधी, मोदी सरकारने व्यावसायिक एलपीजी सिलिंडरच्या किंमती 266 रुपयांनी वाढवून मिठाई महाग करण्याची व्यवस्था केली आहे. पेट्रोलचे दर प्रतिलिटर 116 रुपये आणि डिझेलचे दर प्रतिलिटर 108 रुपये झाले आहेत, तर घरगुती एलपीजी गॅस सिलिंडरचे दर एका वर्षात 598 रुपयांवरून 305 रुपयांनी वाढले असून 903 रुपयांपर्यंत गेले आहेत" असं ट्विटमध्ये म्हटलं आहे. तसेच "आमच्या सरकारने गुणवंत विद्यार्थिनींना महाविद्यालयात जाण्यासाठी स्कूटीचे वाटप केले, पण मुली मोदी सरकारला विचारत आहेत की एवढे महाग पेट्रोल कसे विकत घ्यायचे?" असंही गेहलोत म्हणाले.