कोलवडीत तणाव

लोणीकंद : कोलवडी (ता. हवेली) येथील ज्येष्ठ नागरिक परमेश्वर बबन गायकवाड (वय ५७) यांच्या मृत्यूमुळे काल रात्रीपासून गावात तणावाचे वातावरण होते. अखेर पोलीस अधीक्षक डॉ. जय जाधव यांनी स्वत: चौकशीचे व दोषीवर कार्यवाही करण्याचे आस्वासन दिले. त्यानंतर आज दुपारी नातेवाइकांनी मृतदेह ताब्यात घेऊन कोलवडी गावात त्यावर अंत्यसंस्कार केले.
लोणीकंद पोलिसांनी दिलेली माहिती अशी : कोलवडी (ता. हवेली) येथे वॉरंट बजावण्यासाठी गेलेल्या पोलिसाला मारहाण करण्याविरोधात पोलिसांनी गुन्हा दाखल केल्यानंतर ३ आठवड्यांनी त्यातील एकाने रानमळ्यातील विहिरीत परमेश्वर बबन गायकवाड (वय ५७) यांनी आत्महत्या केल्याचे आज सकाळी उघडकीस आले. या आत्महत्येला संबंधित पोलीसच जबाबदार असून त्यांच्यावर गुन्हा दाखल करावा, अशी मागणी नातेवाइकांनी केली. यामुळे गावात दिवसभर तणावाचे वातावरण होते.
दरम्यान, या प्रकरणी लोणीकंद पोलीस ठाण्यात आकस्मित मृत्यू अशी नोंद ही करण्यात आली आहे. २४ जुलैला सायंकाळी साडेपाचच्या सुमारास पोलीस कॉन्स्टेबल एम. एल. अवघडे हे नवनाथ गायकवाड या व्यक्तीच्या नावाने कोर्टाचे वॉरंट बजावण्यासाठी कोलवडी येथे गायकवाडवस्तीवर गेले होते. या वेळी महेश अर्जुन पवार, परमेश्वर बबन गायकवाड व त्याचा मुलगा सतेज असे तिघे भेटले. या वेळी चौकशीदरम्यान गैरसमजातून बाचाबाची, भांडणे झाली. या तिघांनीही मारहाण केल्याचा आरोप करून अवघडे यांनी या तिघांविरोधात सरकारी कामात अडथळा आणला व मारहाणीचा गुन्हा दाखल केला. त्यानंतर दोनच दिवसांत त्यांच्या सुनेने कॉन्स्टेबल एम. एल. वारघडे यांच्याविरोधात शिवीगाळ व विनयभंगाचा तक्रार अर्ज दिला होता.
दरम्यान, दोन्ही घटनांची चौकशी व कार्यवाही बाकी असताना सोमवारी परमेश्वर बबन गायकवाड घरातून निघून गेले. काल सकाळी १०च्या सुमारास त्यांचा मृतदेह रानमळ्याच्या विहिरीत आढळून आला.
याबाबत बाळासाहेब मुरलीधर गायकवाड यांनी पोलीस ठाण्यात खबर दिली. संबंधित पोलिसावर गुन्हा दाखल करीत नाही तोपर्यंत अंत्यविधीच न करण्याची भूमिका मृताच्या नातेवाइकांनी घेतली.
पोलीस अधीक्षक जय जाधव यांनी या प्रकरणी लक्ष घातले. पोलीस निरीक्षक चंद्रकांत जाधव यांनी परिस्थिती हाताळली. उपविभागीय पोलीस अधिकारी वैशाली कडूसकर पुढील तपास करीत आहेत.
०००