नवी दिल्ली - राजस्थानच्या बूंदी जिल्ह्यातील हिंदौली परिसरात कार आणि बाईकचा एक भीषण अपघात झाला आहे. या अपघातात तीन मित्रांचा मृत्यू झाला. धक्कादायक बाब म्हणजे अपघातातील एकाचा 15 दिवसांनी विवाह होणार होता. लग्नाचे साहित्य खरेदी करून ते परतत होते. याचदरम्यान हा अपघात झाला आणि तिघांचाही मृत्यू झाला. काळाने झडप घातली. पोलिसांनी या प्रकरणाचा तपास सुरू केला आहे. शवविच्छेदनासाठी मृतदेह पाठवण्यात आले आहेत.
लग्नामुळे घरामध्ये आनंदाचं वातावरण होतं. जोरदार तयारी सुरू होती असं असताना कुटुंबीयांवर दु:खाचा डोंगर कोसळला आहे. पोलिसांनी दिलेल्या माहितीनुसार, राष्ट्रीय महामार्गावरील हिंडौली पोलीस ठाण्याच्या हद्दीतील काछी घाटीजवळ रविवारी सायंकाळी हा भीषण अपघात घडला. त्यावेळी प्रेमचंद कहार (25), प्रदीप कहार (17) आणि नितेश कहार (20) हे एकाच बाईकवरून जात होते.
जयपूरहून कोटाकडे जाणाऱ्या कारला त्यांच्या बाईकची जोरदार धडक बसली. या अपघातात तीनही तरुण गंभीर जखमी झाले होते. हिंदौली पोलीस ठाण्याचे पोलीस उपनिरीक्षक जगदीश बाबू यांनी ही माहिती दिली की, घटनेची माहिती मिळताच पोलीस घटनास्थळी दाखल झाले. यानंतर जखमींना उपचारासाठी तातडीने जवळच्या सरकारी रुग्णालयात दाखल करण्यात आले. तिथे त्यांची परिस्थिती पाहता डॉक्टरांना त्यांना कोटा येथे पाठवले.
कोटा येथे उपचारादरम्यान तिघांचा मृत्यू झाला. मृतदेहाचे शवविच्छेदन करण्यात येणार आहे. मृतांमधील प्रेमचंद कहार याचे 15 मेला लग्न होणार होते. यांचसंदर्भात खरेदीसाठी तीनही जण हिंदौली येथे गेले होते. खरेदी झाल्यानंतर ते डोडूंदा येथे परतत होते. याचवेळी ही भीषण दुर्घटना घडली. प्रेमचंदच्या मृत्यूनंतर परिवारात एकच खळबळ उडाली आहे. याप्रकरणी पुढील तपास सुरू आहे. एका हिंदी वेबसाईटने याबाबतचे वृत्त दिले आहे.