नवी दिल्ली - दिल्लीतील नंद नगरी भागात एक दुमजली इमारत कोसळल्याची घटना घडली आहे. घटनेची माहिती मिळताच अग्निशमन दलाच्या तीन गाड्या घटनास्थळी दाखल झाल्या आहेत. अग्निशमन दलाच्या जवानांकडून वेगाने बचावकार्य सुरू असून इमारत दुर्घटनेमागचं नेमकं कारण अद्याप अस्पष्ट आहे. ढिगाऱ्याखाली अनेक जण अडकल्याची भीती व्यक्त करण्यात येत आहे. स्थानिक नागरिक, पोलीस आणि अग्निशमन विभागाकडून बचावकार्य सुरू आहे.
मिळालेल्या माहितीनुसार, शनिवारी (7 ऑगस्ट) दिल्लीच्या नंद नगरी ऑटो मार्केट परिसरातील दुमजली इमारत कोसळली. ढिगाऱ्याखालून दोन जणांना सुखरुपरित्या बाहेर काढलं असून त्यांना उपचारासाठी तातडीने रुग्णालयात दाखल करण्यात आलं आहे. ढिगाऱ्याखाली आणखी काही जण अडकल्याची भीती व्यक्त केली जात आहे. अग्निशमन दलाच्या जवानांकडून शोध मोहीम सुरू आहे.